La Voz / Santiago

Por sorpresa, o presidente da Xunta, Alberto Núñez Feijoo, decidiu remodelar o seu Executivo este domingo. Da Consellería de Sanidade ocuparase en diante Jesús Vázquez Almuíña, alcalde de Baiona, en substitución de Rocío Mosquera, moi queimada tras a última das polémicas nas que se viu envolta: a controvertida entrada en funcionamento do novo hospital de Vigo.

Ademais, o mandatario popular dividiu en dous o departamento de Medio Rural e do Mar, desandando así o paso que dera en xaneiro do 2012. A primeira competencia levaraa Ángeles Vázquez Mejuto, alcaldesa de Melide, e a segunda, Rosa Quintana

Así mesmo, José Manuel Rei Varela, exalcalde de Ferrol, será conselleiro dunha flamante carteira: Política Social. E a macroconsellería do Goberno converterase en dous a partir de agora: Infraestruturas e Vivenda para Ethel Vázquez e Medio Ambiente e Ordenación do Territorio para Beatriz Mato. Os asuntos de emprego absorberaos Economía e Industria, á fronte da cal continúa Francisco Conde

Alfonso Rueda seguirá comandando a vicepresidencia, así como o departamento de Presidencia, Administración Pública e Xustiza. De igual modo que Valeriano Martínez e Román Rodríguez manteranse ao temón, respectivamente, de Facenda e Cultura, Educación e Ordenación Universitaria.

Con estes cambios, o Gabinete pasa de oito a dez departamentos. Os novos conselleiros tomarán mañá posesión dos seus cargos no pazo de Raxoi, Santiago. «A renovación na Xunta supón un novo impulso social, económico e territorial para abordar o novo contexto de crecemento», explicou a Administración nun comunicado emitido á primeira hora da tarde. 

A mesma nota abunda: «Ademais da aposta polos servizos públicos, refórzanse os ámbitos rural e marítimo para que a recuperación poida chegar a todos os sectores e ámbitos poboacionais; así como o medio ambiente e a ordenación do territorio para que esta sexa sostible». O escrito subliña igualmente a «maior presenza do ámbito social» no Executivo.

Esta suma xa a quinta crise de goberno que Feijoo leva a cabo en San Caetano desde a súa chegada ao poder, fai algo máis de seis anos e medio. As anteriores, ningunha delas de tanto calado, tiveron lugar en xaneiro do 2012, en decembro do mesmo ano, en xuño do 2014 e en febreiro do 2015.

«Ilusión e responsabilidade»

Os tres futuros conselleiros aseguraron que afrontan as súas novas responsabilidades con «ilusión» e «responsabilidade». Tamén mostraron a súa «gratitude» ao presidente da Xunta por ter contado con eles para dirixir estas tres carteiras. Así, Jesús Vázquez Almuíña subliñou o seu «agradecemento» a Feijoo por ter confiado nel para substituír a Rocío Mosquera.

Con todo, Almuíña preferiu esperar a este luns, cando tomará posesión do seu cargo, para realizar declaracións sobre a súa nova área e o seu nomeamento. O que si explicou o ata agora alcalde de Baiona é que a persoa que o substituirá decidirase entre os tres tenentes de alcalde nun pleno que se celebrará en 10 días. De momento, será o primeiro tenente de alcalde o que quede como rexedor en funcións.

Pola súa banda, o exregidor de Ferrol e director de campaña do PPdeG para as eleccións xerais, José Manuel Rei Varela, que asumirá o departamento de Política Social, asegurou que afronta con «ilusión», «responsabilidade» e «traballo» as súas novas funcións. E é que o seu obxectivo é, segundo relatou, «devolver» a «confianza» que recibiu por parte de Feijoo «en beneficio» dos galegos.

Mentres, a nova xefa da Consellería de Medio Rural, Ángeles Vázquez Mejuto, mostrouse «orgullosa» de que Feijoo teña contado con el para este proxecto, que afronta con «responsabilidade». «Eu mañá renuncio ao cargo e, entón, hai 10 días para que a xunta electoral nos mande a seguinte persoa, e logo pois vai ser unha decision unánime», relatou a alcaldesa de Melide.

A continuación, esta licenciada en Xeografía e Historia asegurou que esta decisión vai ser «o mellor para Melide», cun grupo «cohesionado» como o que, remarcou, «tiña ata agora» Vázquez Mejuto. «Contará co meu apoio a persoa que quede», subliñou a que asumirá a Consellería do Medio Rural, para logo precisar que, de momento, non se tomará «ningún tipo de determinación», xa que sostén que hai concelleiras que nin sequera se atopan este domingo en Melide, como é o caso dunha edil que está en Sicilia.

Reaccións da oposición

As primeiras reaccións da oposición ás modificacións no organigrama institucional chegaron a través das redes sociais. Nelas, o portavoz do BNG no Parlamento, Francisco Jorquera, sentenciou: «Feijoo intenta salvar un goberno morto, máis sinto dicirlle que a resurección non existe». Pola súa banda, a viceportavoz de AGE na Cámara, Yolanda Díaz, espetou: «O PPdeG e Feijoo ven a súa derrota no outono do 2016. Colócanse na parrilla de saída e temen á unidade popular».

«Feijoo -valorou o secretario xeral do PSdeG, José Ramón Gómez Besteiro- enméndase a si mesmo no tempo de desconto do seu mandato. Admite o fracaso da súa xestión sanitaria e do seu goberno». «Feijoo lidera agora mesmo un goberno en crise que deixa un país en crise», engadiu o líder dos socialistas.

Coñece toda a nosa oferta de newsletters

Creamos para ti unha selección de contidos para que os recibas comodamente no teu correo electrónico. Descobre o noso novo servizo.

Votación
71 votos
Comentarios

Feijoo remodela por sorpresa o seu Goberno