A empresa, que deseña un novo asento de espuma para Ferrari, desenvolve o proxecto Smart Factory Auto e recibirá unha inxección de 4,5 millóns
14 oct 2019 . Actualizado ás 11:07 h.O grupo Copo creará 150 postos de traballo coa posta en marcha da súa fábrica intelixente. Así o manifestou a directora da Axencia Galega de Innovación (Gain), Patricia Argerey, que visitou as instalacións do grupo en Mos para coñecer os avances no proxecto Smart Factory Auto que están a desenvolver en colaboración co Centro Tecnolóxico da Automoción de Galicia (CTAG) e co apoio da Xunta. A empresa acaba de entrar no mercado premium co deseño dun novo asento de espuma para Ferrari.
Durante a visita, a directora de Gain destacou o impacto que se agarda conseguir con esta iniciativa, dotada con preto de 4,5 millóns de euros, na competitivad da empresa. Así, prevese mellorar o volume de negocio da factoría nun 10 %, aumentar nun 25 % a súa produtividade e xerar os mencionados postos de traballo. Para iso, están a levar a cabo cinco liñas de investigación centradas no emprego de materiais avanzados para mellorar o confort no coche; termoconformación 4.0; fábrica conectada; simulación e optimización de produtos e demostradores de procesos pilotos en produtos avanzados.
Argerey apuntou que grazas a este traballo Copo poderá «producir dun xeito máis flexible e eficiente novos compoñentes e dar resposta, deste xeito, ás demandas dúas seus clientes». Así mesmo, agárdase que os resultados obtidos con esta iniciativa, que conta co apoio da Xunta no marco do programa Fábrica Intelixente, poidan ser trasladados ao resto do tecido industrial.
A directora de Gain puxo de exemplo a Copo de referente en innovación e calidade, grazas á súa aposta pola innovación, a formación e a internacionalización. Mostra diso é o proxecto que está a desenvolver no ámbito da fábrica intelixente, as tres unidades mixtas de investigación nas que participa e o traballo que desenvolve no seu propio centro de I+D.
Argerey situou ao conxunto do sector da automoción á vangarda grazas ao gran esforzo que está a realizar en innovación e eficiencia. Tamén pola factoría de PSA en Vigo como un referente de fábrica intelixente e polo Centro Tecnolóxico da Automoción de Galicia, que constitúe un centro de referencia tanto a nivel estatal como europeo, que desenvolve proxectos de I+D estratéxicos para o sector e que conta con máis de 900 traballadores.
Ademais da planta de Mos, Copo ten fábricas no Porriño, Zaragoza, Cuba, Brasil, Portugal, México, República Checa e Alemaña.
O grupo arrincou a súa actividade no ano 1969 como Espumaciones Industriais Roday S.L. Baixo este nome fabricábanse espumas para colchóns e sofás, un negocio que en 1972 experimentou un xiro de 180 graos grazas á visión dos seus socios fundadores: Antonio Estévez, Francisco Ayuso e Román Yarza, cando Vigo entrou de cheo en sector de automoción.
O conselleiro delegado da empresa, Jose Antonio Rodríguez Estévez, sempre dixo que os empregados das plantas do grupo, xa que «son o alicerce fundamental». Actualmente, Grupo Copo é unha holding cuxa cifra de empregados elévase ata os 1.500 entre todas as plantas e unha facturación que acada os 210 millóns de euros.