O BBVA estima un crecemento da economía galega do 5,6 % neste ano

O crecemento da economía galega será do 5,6 % este ano (caeu o 9,4 % no 2020), e do 5,4 % no 2022, que se pechará cun 11,3 % de paro tras a xeración de 33.000 postos de traballo no período 2020-2022. Son as estimacións presentadas en Santiago polo economista xefe para España de BBVA Research, Miguel Cardoso, e a directora da Territorial Noroeste do BBVA, Marta Alonso. O consumo de fogares é o principal apoio do crecemento económico, con sectores como hostalería, restauración e lecer favorecidos pola flexibilización de restricións, con recuperación do turismo nacional no ano do Xacobeo, mentres o turismo estranxeiro continúa aínda por baixo dos niveis precrisis. Destacou Cardoso o crecemento do gasto público (coa Xunta mantendo unha política expansiva) e o bo comportamento, a pesar da situación difícil dos sectores de téxtil e automoción, das exportacións: no acumulado ata setembro, avanzaron as exportacións de bens galegas en todos os sectores. Entre os datos da «recuperación robusta» da economía galega no actual exercicio, o informe de BBVA Research sinala que en setembro Galicia recuperara xa os niveis de afiliación á Seguridade Social previos á pandemia, salvo as zonas non urbanas e as cidades de Santiago e Ferrol e as súas áreas urbanas, moi afectadas pola pandemia e cun nivel de emprego inferior ao do peche do 2019. En canto ao gasto en Galicia con cartón (de clientes do BBVA e en terminais da entidade financeira) en outubro superou nun 35 % ao do mesmo mes do 2019. O informe sostén que o levantamento das restricións en maio permitiu acelerar o gasto en restauración, transporte, lecer e aloxamento.

O economista sinalou un incremento na taxa de aforro. Sobre a venda de vivendas, supera os niveis prepandemia, cun 38,2 %  por amais do 2020 e un 21,2 % máis que no 2019 nos nove primeiros meses do ano. No primeiro trimestre do ano creceron os prezos das vivendas, fronte á tardanza dunha década en facelo na anterior crise.

Cardoso apuntou riscos de futuro pola incerteza sobre a evolución da pandemia (é vital para as exportacións galegas acadar maiores porcentaxes de vacinación nos países consumidores, subliñou) e o incremento de custos a empresas (combustibles, electricidade, falta de colectores e ruptura de cadea de subministración de insumos). Alertou sobre a retardación de a execución de fondos Next Generation, que debe acelerarse para que o gasto público releve ao privado, que admitiu ten caducidade e empeza a mostrar signos diso. O informe mantén un rumbo á baixa sobre as súas previsións económicas. Cardoso agarda que a actual inflación «sexa máis baixa no 2022 que neste final de ano», e comece a reverter cara a febreiro-marzo; de facerse permanente, alerta do risco de que as negociacións colectivas entre empresas e traballadores basculen en exceso cara a unha das partes, e entón «mátese a recuperación do consumo ou se mate a recuperación do emprego polas empresas», todo iso nun contexto de incerteza pola reforma laboral. Miguel Cardoso tamén apuntou un posible incremento de insolvencia de empresas e morosidade nos próximos meses, ao concluír o período de carencia dos créditos públicos como os do ICO, que podería supor destrución de emprego.

---

---

---