Asefor ofrece servizos técnicos de enxeñería forestal a todos os integrantes do sector madeireiro coa sustentabilidade por bandeira
13 oct 2021 . Actualizado ás 16:11 h.«Investir nos servizos do ecosistema en montes de Galicia é investir en servizos esenciais para a vida». É unha das máximas de Asefor , consultoría que ofrece servizos técnicos de enxeñería a todos os integrantes do sector forestal, desde propietarios ata industria. Dentro destas tarefas atopar o apoio aos propietarios de montes na súa xestión, na trazabilidade dos produtos ou na posta a piques dos diferentes trámites que hai que realizar para cumprir aspectos legais; ou como resume Manuel Beiro, un dos seus socios, «impulsamos dixitalmente o sector forestal cara un desenrolo sostible dos recursos do medio rural».
Para facelo, unha das súas ferramentas máis populares chámase Bikenta e permite aos donos de montes manter vixiadas e actualizadas as súas propiedades. «O nome provén de xuntar a palabra bioeconomía con coidadores de árbores e pretende ser unha plataforma para impulsar o desenrolo do sector forestal galego», explican. Na súa creación e desenvolvemento está o departamento de I+D e innovación de Asefor, e comparte nome coa plataforma web de acceso gratuíto que se lle ofrece aos máis de 10.000 usuarios do grupo Alvariza: cada propietario dispón de información dos seus terreos, as afectacións por lei de incendios, ambientais, patrimonios, especies ameazadas...
Asefor naceu no ano 2010 da man de tres traballadores da empresa pública Seaga (Raquel González e Marcos Rivas, xunto con Beiro) e o seu primeiro encargo tivo que ver cunha certificación do selo Alvariza FSC, que promove unha xestión forestal ambientalmente apropiada, socialmente beneficiosa e economicamente viable. Desde entón, unha parte importante do seu traballo consiste en guiar a empresas que precisen destas certificacións. Todos os servizos están conectados a través de ferramentas dixitais con accesos personalizados, porque hai un abano moi amplo de empresas neste sector: desde maderistas ou serradores ata fábricas de mobles que necesitan acompañar os seus produtos cos selos de xestión forestal sostible.
Os promotores de Asefor recoñecen que os inicios non foron doados desde o punto de vista económico, pero a persistencia, a colaboración e a formación foron claves para ir logrando os obxectivos. Once anos despois, a empresa conta cun equipo multidisciplinar de trece profesionais e ten unha facturación anual por amais dos 500.000 euros. Grazas á orixe dos seus socios -Ferrol, Lugo e Santiago-, puideron abarcar todo o territorio galego; pero teñen bosques certificados noutras provincias españolas e tamén realizan tarefas en Portugal onde «o catastro aínda non está presente en todo o territorio», subliña Beiro.
Asefor enmárcase nun sector no que se están producindo moitos cambios que obrigan ás empresas a adaptarse polo cambio climático ou o desenvolvemento sostible, «e o efecto do covid acelerou estas cuestións que preocupan aos países», engaden. Por iso, o seu papel é clave neste proceso de dixitalización que, remarcan, débese realizar coa simbiose entre empresas TIC e de enxeñería forestal. Así, hai que falar tamén do asesoramento que reciben desde o DATALife Hub de Innovación Dixital: «A situación do sector forestal precisa de un impulso dixital e apoio a produtores e empresas. Con este obxectivo é co que tratamos de avanzar no desenrolo de proxectos que son apoiados polo HUB».