Os galegos perderon máis dun punto de poder adquisitivo no 2018

Cinco anos coa economía crecendo a un forte ritmo pero os salarios seguen sen despegar. Esta é unha das conclusións que se extrae da enquisa trimestral de custo laboral publicada onte polo INE. As remuneracións dos traballadores aumentaron o ano pasado, si, pero case sete décimas menos que a inflación, que pechou o 2018 cun incremento medio do 1,69 %. Fronte a este avance dos prezos, os traballadores só viron mellorados os seus ingresos de media 18,87 euros ata os 2.039 euros ao mes, tamén de media, o que supón un aumento interanual do 0,98 %, menor que a revalorización que tiveron os pensionistas, acorde ao IPC. No caso de Galicia , aínda foi peor. Os soldos só subiron un 0,4 %, máis dun punto menos que a inflación, ata os 2.417,6 euros.

Trátase da subida que experimentou o custo salarial total do traballador (que inclúe soldo basee, complementos salariais, pagamentos extraordinarios e pagamentos atrasados) e que está en consonancia co incremento do custo laboral, que rematou o 2018 cun aumento do 0,9% ata os 2.692 euros, que é o que a unha empresa lle custa de media un empregado, contando tamén coas cotizacións sociais. Rexistra así o segundo maior avance dos últimos tres anos, só superado pola alza do 1,9 % do terceiro trimestre do 2017, e encadea seis trimestres consecutivos en positivo. Con toda probabilidade, crecerá aínda máis no primeiro trimestre de 2019 pola entrada en vigor do novo salario mínimo, que repercute nunha forte subida do 22 % das bases mínimas, e á súa vez pola alza das cotizacións.

---

---

---