Trátase do seu cuarto gol en seis partidos
20 oct 2020 . Actualizado ás 23:26 h.O Leipzig, semifinalista da pasada edición da Champions, abriu este martes a competición cun cómodo triunfo sobre o Basaksehir turco (2-0) grazas a dous goles de Angeliño Tasende. O lateral zurdo abriu o marcador no minuto 16 e repetiu só catro minutos máis tarde. O olfacto goleador está a acompañar ao xogador galego, que acumula catro tantos nos seis partidos que disputou esta tempada. Co dobrete, o primeiro da súa carreira profesional, Angeliño, de 23 anos, chama á porta de Luis Enrique para entrar nos plans da selección española.
Ao Leipzig abondáronlle 20 minutos para liquidar o partido ante un rival que deu mostras de nerviosismo e que estivo nos primeiros minutos apagando incendios na súa propia área ante os avances do equipo alemán.
A primeira ocasión para o Leipzig tívoa o propio Angeliño no minuto 4 tras un pase cruzado á área de Nkunkú desde a dereita. No 6 foi Dayot Upamecano o que estivo preto cun remate de cabeza tras un saque de esquina.
O campión turco sólo deu sinais de vida nun contragolpe no minuto 9 no que ao final Upamecano acadou a atravesar o pé no remate de Crivelli.
No 16 Angeliño abriu o marcador tras recibir un pase de Kevin Kampl cun remate de zurda tras un bo control de balón e un xiro para desfacerse o home que o marcaba.
Catro minutos despois Angeliño marcou o segundo nunha xogada que se iniciou cunha recuperación de balón de Youssuf Poulsen na metade contraria. Poulsen xogou con Nkunku e leste con Angeliño que marcou cun remate dentro da área.