Almas que emerxen da noite

Ramón Nicolás

FUGAS

O escritor Diego Ameixeiras vén de publicar «O cervo e a sombra».
Ou escritor Diego Ameixeiras vén de publicar «Ou cervo e a sombra».

«O cervo e a sombra» é a novela máis redonda e desacougante das que publicou ata agora Diego Ameixeiras

27 ene 2022 . Actualizado ás 15:43 h.

Sempre entendín a escrita de Diego Ameixeiras como un exercicio de honestidade; esixente e discreto, afastado do compracente a perseguir con devezo e teimosía horizontes gobernados pola intensidade, emocional e narrativa. Un exercicio do que se aprende moito e que, como lector, resulta imposible quedar indiferente. Confírmame esta percepción O cervo e a sombra: talvez a novela máis estilizada, máis redonda e, ao tempo, máis desacougante e penetrante entre as que deu a coñecer ata agora, pois nela a palabra convértese en gume que disecciona as estremas, que as hai, da condición humana.

Cuns diálogos que brillan con luz propia, o ritmo vertixinoso que se enseñora a proposta —ideada se cadra a través dunha sucesión acertada de fotogramas narrativos—, xunto á acaída dosificación argumental que nos fai ser parte activa e actuante, a carón desa atmosfera do Ourense de hai seica un par de décadas, resultan claves para explicar algunha das razóns que nos obriga a empatizar cunha sombra que é o personaxe de Mateo: un provedor de droga que conta en primeira persoa unha historia de redención e de esperanza. Non todas as cousas son como parecen en primeira instancia e Mateo revela, con certeza, que o seu mundo é, ou foi, un ente complexo onde nada é branco ou negro. Nel inzan anxos custodios e insurxentes que terman dunha esperanza por veces transformada en algo tanxible, pero que, noutras, se esvaece e abre a porta ao abismo.

A novela convídanos a tocar as «cicatrices invisibles», rescata historias silandeiras e silenciadas e ten a rara habilidade de permitir que sintamos na pel o tormento que sofren os «espectadores atormentados do mundo». A estes podemos acompañalos nunha viaxe en forma de espiral onde atopamos violencia, si, mais ao tempo fardeis de memoria familiar e colectiva, entrelazados con historias de amizade luminosas, taleigas anoadas ao amor e desexo. Un libro poboado de almas que emerxen da noite, que veñen desde o lado máis salvaxe, para quedar na nosa memoria.