As editoriais envórcanse co aniversario do Apolo 11. Estes son algúns dos títulos máis destacados sobre aquela odisea espacial
19 jul 2019 . Actualizado ás 13:10 h.Era un domingo pola tarde e o marcador anunciou: «¡Están na lúa!». A foto deste instante de xúbilo nun partido de béisbol en Filadelfia é Historia. O 20 de xullo de 1969 a ciencia ficción fíxose realidade. Neil Armstrong e Buzz Aldrin, por esta orde, convertéronse nas dúas primeiras persoas en pisar a superficie lunar mentres Michael Collins permaneceu no módulo de comando do Columbia. Un equipo de 400.000 científicos cumpriu a promesa formulada por Kennedy en 1960. Cun orzamento de 24.000 millóns de dólares e unha retransmisión televisiva que deu a volta ao planeta, o satélite situado a 386.000 quilómetros antollouse terreal. A fascinación que esperta aquela viaxe de 76 horas de ida no Apolo 11 e do que se cumpren 50 anos segue inspirando aos lectores máis lunáticos.
Novos na librería
As editoriais non quixeron desaproveitar o efecto lunar. Unha das novidades é As mil caras da Lúa, da astrofísica española Eva Villaver. A profesora da Complutense entrelaza coñecemento científico con tradición cultural. Villaver di que «non hai nada máis incorrecto que dicir que estamos a regresar á Lúa». Sempre estivo aí. Marca o ritmo da vida na Terra, estabiliza o seu eixo de rotación e ordena o tictac do reloxo biolóxico.
Tamén novo é Apolo 11. Asínao Eduardo GarcíaChama , enxeñeiro español que traballa na NASA, onde forma parte do Programa Orión, que contempla o desenvolvemento da nova nave tripulada coa que a axencia norteamericana volverá á Lúa e quere viaxar a Marte. A novela conxuga perspectiva técnica e humana. A través das transcricións oficiais do voo, e das biografías dos seus tres tripulantes, reconstrúe os momentos decisivos daquela odisea.
Xogando coa frase de Armstrong que é xa parte da nosa historia, Rafael Clemente asina todo un clásico para lunáticos: Un pequeno paso para [un] home. O fundador de CosmoCaixa en Barcelona inclúe o matiz do artigo indeterminado, o «un» que se obviou nos relatos posteriores. O enxeñeiro detense nos pequenos detalles da xesta considerada como a viaxe máis épica da Humanidade. Unha aposta pola explotación espacial que alimentou a Guerra Fría. En 1961 a extinta URSS fixo historia ao pór en órbita ao primeiro ser humano: Yuri Gagarin. Esta rivalidade desenvólvea o historiador Ricardo Artola na carreira espacial: do Sputnik ao Apolo 11. Un libro capaz de facer crente ao máis escéptico coa conquista do satélite.
A edición orixinal costa 750 euros, pero en castelán podemos adquirila por 30. Moonfire recompila extractos do texto de Norman Mailer, Of a Fire on the Moon, con imaxes dos arquivos da NASA, hemerotecas e coleccións privadas. Unha xoia bibliográfica. Desde unha perspectiva menos literaria, Laurousse publicou fai uns anos Descubrir a Lúa, unha guía turística ao longo da xeografía lunar, dos seus mares, cráteres e montañas.
Propón 14 sesións de observación. Para rematar, a historia da misión, que concluíu o 24 de xullo cunha amaraxe impecable no Pacífico, é tamén a dos seus tres protagonistas. The First Man é o título que inspirou a película de Damien Chazelle na que Ryan Gosling é o comandante Armstrong. Debate reeditou a biografía de James R. Hansen sobre o astronauta, o único dos tres daquela primeira aluaxe tripulada que xa non vive. Libros para ir ata a Lúa e de volta, como di o popular conto.
Máis noticias relacionadas