A frialdade norueguesa ou a furia española. Dúas autoras, dúas nacionalidades e dous bos «thrillers» que nos atrapan con redes moi distintas, pero igual de eficaces
31 may 2019 . Actualizado ás 05:00 h.Es de tripas ou de cerebro? Propómosche dous bos thrillers que che farán vibrar de moi diferente forma. Se a norueguesa Agnes Ravatn escribe para que a nosa mente reaccione e presiónanos e inquieta creando unha atmosfera claustrofóbica que nos fai sentir angustia vital; a española Camen Mola (aínda que en realidade escribe baixo pseudónimo e ninguén sabe quen se oculta tras ese nome) diríxese ao noso corazón e ao noso estómago, que queda encolleito e revolto tras recibir a puñada que o seu historia criminal nos lanza ás tripas. As dúas conquístannos. Apúntaas na túa lista de libros para ler estas vacacións. Xa me darás as grazas.
Versión de rebeca
Seguro que che acordas de Rebeca de Daphne Du Maurier ou polo menos terás visto a película de Alfred Hitchcock... pois cando leas O tribunal do paxaros de Agnes Ravatn non poderás evitar pensar nesa vella e magnífica historia. Ou polo menos iso pasoume a min. Allis Hagtorn decide aceptar unha estraña oferta de emprego e farase cargo da casa e o xardín dun home misterioso: Sigurd Bagge. Xuntos agardan inquedos a volta da señora da casa nun ambiente tenso e claustrofóbico infestado de silencios no que van xurdindo retrincos do complexo pasado de ambos. Non hai trama nin misterio policial, apenas hai acción, pero o libro mantenche en albas cunha atmosfera desasosegante que che quitará o soño.
O que si hai é unha interesante referencia aos heroes mitológicos nórdicos e unha historia romántica de trama clásica que a intres che envolve nunha falsa sensación de seguridade para invitarche a tomar parte no xogo. Un xogo no que o teu único papel é agardar, ler e ver que pasa. Aínda que ás veces che falte o aire.
Unha prosa esmerada, un léxico escollido e unha puntuación pouco ortodoxa (sen guións que marquen os diálogos) son xa sinais do que a autora nos quere transmitir. Un ambiente innovador e sofisticado que se percibe nos detalles máis domésticos, como a comida ou o viño, como fórmula para combater o illamento emocional dos protagonistas. Allis e Sigurd esconden moitos segredos. E eu non chos vou a revelar.
O libro hase convertido xa nunha obra de teatro de éxito en Noruega (leva dous anos en cartel) e pronto terá a súa propia versión cinematográfica.
Se xa coñeces a Carmen Mola, saberás que a súa proposta é moi intensa. Se non a liches aínda, empeza pola noiva xitana, porque A Rede Púrpura é a súa segunda parte. Aquí volve aparecer a singular inspectora Elena Blanco e a súa Brigada de Análise de Casos. Tamén están o seu inevitable grappa e as súas visitas nocturnas ao karaoke.
A autora oculta Carmen Mola, que a pesar do éxito négase a dar a cara, volveu a escribir unha historia descarnada e violenta que nos acelera o pulso e fainos apartar a vista das páxinas (non é doado pór imaxes a algunhas das crueldades que describe), para un instante despois volvelas a devorar con maior inquedanza.
Persoas sen moral
Os heroes imperfectos, a exhibición nas redes dos peores aspectos da sociedade, a sinistra deepweb, o terror ancestral de perder a un fillo... todo está na trama E ofrécellenos en pílulas pequenas, refachos de acción que van directas ás nosas tripas. Sadismo, persoas sen moral, menores explotados, adicción ao xogo, o máis baixo do ser humano sae á superficie nesta novela que ten como escenario as rúas de Madrid. Un Madrid que se estende ata os barrios de chabolas onde a droga reina na miseria.
Unha historia chea de forza, que se le en dous días e non se demora en recursos estilísticos nin pretende cegarnos coa súa prosa: vai directa á acción e ao poder do suspense. E ao estilo do gran Pierre Lemaitre non nos aforra ningunha crueza, nin nos resta unha gota de sangue. Máis ben déixaa correr en ríos.
Se queres vivir a experiencia completa busca a playlist das cancións que a inspectora Blanco canta no karaoke. Nicola dei Bari e Adriano Celentano porán o contrapunto romántico a tanto sufrimento.
As dúas novelas serán pronto unha serie.
