Os lucenses colleron voo cun parcial de 22-0 no primeiro cuarto e chegaron a dominar por 41 puntos
03 feb 2023 . Actualizado ás 21:09 h.Levaba tempo o Pazo sen asistir a un festival de semellante calado. O delirio foi continuo ante un Covirán Selecta esnaquizado por un Río Breogán que levantou unha barreta de formigón na súa canastra e cribou sen piedade a contraria. Fíxoo de todas as formas e xeitos, pero sobre todo con rápidas e ben elaboradas transicións xeradas co seu sobresaliente traballo defensivo. A novena vitoria da tempada sitúa ao equipo lucense moito máis preto do listón que marca a permanencia na Liga Endesa.
A importancia que se lle daba ao partido por parte do Breo, a pesar de ter a salvación perfectamente encarrilada, era tal que pouco despois do primeiro minuto, e con 2-2 no electrónico, Veljko Mrsic xa pediu a revisión dun saque de fondo que os colexiados concederan aos nazaríes. Renfroe estableceu o 2-4 no poste baixo e a resposta dos lucenses non se fixo agardar e foi irresistible. Moi irresistible. Parcial de 22-0 en algo máis de cinco minutos de fantasía. Defensa impenetrable e contragolpes vertixinosos e letais. Pablo Pin non atopaba o xeito de aplacar o vendaval celeste e asistía perplexo ao festival dos celestes. Foi Ndoye o que volveu mover o marcador para o seu equipo nunha acción moi protestada polo Pazo e cobrada con canastra e tiro adicional. Osíxeno en forma de puntos para un Granada encolleito e asustado pola sobresaliente defensa do Breo, que pechaba a primeira manga con unha impensable fenda no marcador: 29-12.
Na primeira pausa a dúbida era se o Breogán sería capaz de manter un nivel de xogo tan excelso. E non só o conseguiu senón que mesmo o perfeccionou. Recital de canastras e boas defensas para delicia dun Pazo entusiasmado e para desesperación dun Granada avergonzado e sen un claro patrón de xogo. A diferenza seguiu crecendo de forma incesante, calquera que fosen os xogadores sobre a cancha, e acadou a trintena (50-20) cun parcial de 9-0 do que Erik Quintela foi partícipe directo. Ao descanso (59-24) non quedaba nin rastro da desconfianza que xerara o partido en parte da afección. No ecuador do choque, Stefan Momirov era o único dos guerreiros de Veljko Mrsic que aínda non estreara o seu cuadrícula de puntos e Scott Bamforth, o máis adiantado nesa faceta con 11 tantos.
O terceiro cuarto arrincou con tres triplos consecutivos. Justus Hollatz e Momirov anotaron os dous primeiros e a diferenza no luminoso foise ata os 40 puntos (65-24). Un leve reacción nazarí (2-10) animou a Mrsic ha solicitar tempo morto e dar un pequeno tirón de orellas aos seus homes, que aínda tardarían algúns minutos en volver a enchufarse. Tras a interrupción pola lesión dun dos colexiados, Happ devolveu o partido á súa canle con catro puntos consecutivos. Mrsic, con todo, seguía de pé na banda arengando e corrixindo ao equipo. Prohibida a relaxación ou o lucimento persoal. O ritmo ía a menos, pero nin así conseguía o Selecta neutralizar o abafador dominio breoganista. Só o veterano Lluis Costa exhibía certo rigor nas filas visitantes. O cuarto e definitivo período foi de trámite para os lucenses e outra auténtica tortura para o Granada, que tardará en esquecer o seu tráxico regreso ao Pazo. O Breo avergonzouno e estirou a súa serie de derrotas, que agora é de dez consecutivas.
Consulta aquí as estatísticas do partido