Mrsic: «Para gañar ao Fuenlabrada temos que xogar ao mesmo nivel que en Murcia»
FORZA BREO
A expedición breoganista regresou de Murcia este venres a media tarde. E nada máis baixar do autobús, Veljko Mrsic foise directo á sala de prensa do Pazo para ofrecer as súas últimas impresións da vitoria fronte ao UCAM e analizar o partido da segunda xornada ante o Fuenlabrada, o domingo as 12.30 horas. Feliz polo triunfo e con claros signos de cansazo pola longa viaxe, o preparador do Río Breogán volveu pór en valor o conseguido e fixo fincapé na forma. «Había dúbidas polo partido en Belgrado, pola cantidade de xogadores novos que temos e pola resposta daqueles que facían o seu debut na ACB. Estamos moi contentos pola vitoria e, sobre todo, polo xeito de conseguila. Xogamos como equipo desde o inicio», congratulouse Mrsic, incapaz de quedar cunha soa virtude do seu equipo no Palacio dos Deportes de Murcia: «Estivemos ben en moitas facetas. Dominamos o rebote, controlamos o partido desde o primeiro minuto, non deixamos que os seus tiradores estivesen sos, controlamos o bloqueo directo co que conseguen moitos puntos...», dixo. As 15 perdas de balón foron o único lunar. «Temos que mellorar a circulación do balón», advertiu.
Resolta a resaca do debut ligueiro, o estratego croata pasou a analizar a nova e inminente cita que, na súa opinión, é case máis importante que a anterior porque o Fuenlabrada se trata, en principio, de «un rival directo». Ao seu xuízo, a derrota que vén de sufrir en casa ante o recentemente ascendido Covirán Selecta faino aínda «máis perigoso», polo que non cabe a relaxación. «Para gañar temos que xogar ao mesmo nivel que en Murcia», avisou.
Á hora de sinalar aos xogadores máis determinantes do persoal dirixido por Josep María Raventós, o preparador breoganista sinalou a Clevin Hannah, Lasan Kromah e Jeremy Senglin, exteriores «con moitos puntos nas súas mans», así como á torre serbia Dusan Ristic.
Como o Breogán, o conxunto fuenlabreño tamén disputou este xoves un partido tremendamente competido e o cansazo pode pasarlle factura. «A ver que equipo recupérase mellor. Iso será importante», razoou o adestrador do Río Breogán.