Ao longo da historia do club, só Riley, Davis, Musa e Singleton lograron mellor valoración que o pivote de Illinois na xornada inicial da Liga ACB
02 oct 2022 . Actualizado ás 18:41 h.Lactuación de Ethan Happ na cancha do UCAM Murcia xa forma parte da historia do Río Breogán na ACB. E non porque a súa achega teña servido para conquistar un título ou festexar un ascenso, senón porque os seus números están á altura de grandes lendas breoganistas e superan con fartura aos doutras como Charlie Bell ou Velimir Perasovic na primeira xornada do campionato. Nas 19 campañas anteriores do equipo lucense na competición que desde 1983 xestiona a Asociación de Clubs de Baloncesto —con anterioridade competira seis cursos en Primeira Nacional—, só George Singleton, Claude Riley, Devin Davis e Dzanan Musa, que acabarían por converterse en ídolos do breoganismo, superaron os 33 créditos de valoración da torre de Illinois nun partido inaugural da fase regular. En 26 minutos e 51 segundos sobre o parqué, Ethan Happ anotou 19 puntos, con 8 de 13 en lanzamentos de dous e 3 de 6 en tiros libres, recolleu 11 rebotes (7 defensivos e 4 ofensivos), deu unha asistencia e sufriu cinco faltas persoais.
A marca de valoración breoganista nunha xornada inicial da ACB compárteno Claude Riley e Devin Davis, que chegaron aos 40 créditos. O primeiro, xogador celeste entre 1990 e 1993, fíxoo na súa última campaña en Lugo nun gran debut ante o poderoso Barça no que os homes do estrañado Ricardo Hevia estiveron a piques de conquistar o Palau (95-91). Riley disputou 39 minutos e acabou o encontro con 34 puntos e 8 rebotes (2 en defensa e 6 en ataque).
Sete anos máis tarde igualaría a marca Devin Davis. No arranque do curso 2000-2001, a á-pivote de Miami tamén acadou os 40 créditos de valoración no derbi ante o Ourense no Pazo que acabou con vitoria visitante por 84-85. Converteu 26 tantos e capturou 8 rebotes, entre outros méritos.
Singleton e Musa foron os outros xogadores do Breo que protagonizaron unha estrea máis brillante que o de Happ. O pivote de Carolina do Sur chegou aos 34 créditos na liga 89-90 grazas aos seus 33 puntos e 11 rebotes que, ademais, foron determinantes no triunfo por 69-59 sobre o Fórum Valladolid de Sabonis .
A heroicidade de Musa é máis recente. Hai só un ano, a estrela bosníaca acadou unha valoración de 35 créditos grazas aos seus 25 puntos, 7 rebotes e 2 asistencias na esmagadora vitoria (92-73) sobre o Lenovo Tenerife no encontro disputado no Pazo dous Deportes.
Erik Quintela é dúbida para a cita de mañá por lesión
O xogador do Río Breogán Erik Quintela sofre un problema muscular que o converte en dúbida para o encontro da segunda xornada ante o Carplus Fuenlabrada, que se disputará este domingo a partir das 12.30 horas no Pazo dous Deportes. Por esa mesma razón xa non puido estar a disposición de Veljko Mrsic no encontro do xoves na cancha do UCAM Murcia,
O Fuenlabrada, salvo contratempos de última hora, presentarase no santuario breoganista co persoal ao completo e despois de sufrir unha dolorosa e inesperada derrota en casa ante o recentemente ascendido Covirán Selecta por 81-83 na xornada inicial do campionato.