Primeiro anunciáronnos que non habería máis fichaxes, o Consello xa tiña experiencia en que non convén tirar máis do que hai. Despois, o Director Xeral díxonos que estaban buscando un xogador novo, cuxa principal función sería a de axudar nos adestramentos e cubrir un oco se se producía algunha baixa.
Ao final, a fichaxe é un xogador experto, grande, e que se supón vén pechar un equipo nesa posición interior, onde a moitos afeccionados lles parecía que andabamos curtos. Israel é un xogador grande, non soamente moi alto, senón tamén con moita envergadura. O seu perfil é máis defensivo que ofensivo, é bastante móbil o que lle permite pasar ben sobre os bloqueos directos. Tamén defende correctamente o pick and roll, sabe asomarse e volver. Non é un gran defensor de costas no un contra un, pero intimida moito e iso axúdalle.
É un bo reboteador, mellor ofensivo que defensivo, pero non cabe dúbida que axudará moito no rebote. É un xogador de equipo, non unha figura. Non ten unha gran man, entende ben o xogo, sobre todo en defensa. En ataque non xoga ben de costas ao aro, nin coa súa envergadura e o seu físico, sela ao seu defensor, é un xogador para darlle o balón debaixo do aro, despois dunha continuación.
É moi correcto e con boa ética de traballo. Resumindo, o Breogán fichou un xogador grande, un bo reboteador, pode xogar por amais do aro e non gastará moitos tiros. Se Ahonen recupérase ao 100%, con Israel, o Breogán pode ter pechado un equipo redondo.