Os de Lezkano chegaron a ir gañando por 15 puntos no terceiro cuarto, pero descompuxéronse ante o arreón dos maños no último parcial
18 novs 2018 . Actualizado ás 22:47 h.Tivo o Breogán a vitoria na man, pero deixouna escapar entre os dedos nos compases finais. O Zaragoza non perdeu a calma cando se puxo 15 abaixo no terceiro cuarto, asfixiado pola boa man dos lucenses desde a liña de tres. O triunfo lles catapulta cara á parte alta da táboa, mentres que o seu rival queda nunha situación delicada. Dúas vitorias en nove xornadas, cun calendario complicado por diante.
As baixas condicionaban a ambos os equipos. Sen Fran Vázquez nas filas mañas por unha faringitis, sen Arco nin Kinsey nas lucenses por problemas físicos.
Justiz e Barreiro conseguiron as primeiras canastras para os de Tecnyconta. Saltaran fríos os de Cafés Candeas, con problemas para organizar un ataque con sentido e para blindarse defensivamente. Obsesionados por tapar a McCalebb, as fugas de auga chegaban por outras vías. Mediado o cuarto, Lezkano fixo unha rotación que cambiou o partido. A entrada de Redivo achegaba penetracións, ritmo e criterio nas ofensivas locais. Tamén Fisac movía ficha coa entrada de Nacho Martín por Radovic.
Pechábase o Zaragoza nunha zona, deixando ao Breogán tirar de fóra, pero saíulles mal a xogada, porque aos de casa empezou a entrarlles o triplo. Un de Vidal e outro de Cvetkovic enganchábanlles ao partido e o primeiro cuarto baixaba o pano a dous de diferenza (17-19).
Uriz, Redivo, Löfberg, Sule e Jordan foi o quinteto escollido para pelexar de inicio polo segundo cuarto. Seguían entrando de tres e o sueco puña por diante aos celestes por primeira vez en todo o partido cun lanzamento afastado. Chegaron a pórse a cinco, pero Berhanemeskel era un puñal. Dobrando, con penetracións e as súas combinacións con McCalebb deixaron aos celestes comatosos pouco antes do descanso. Desatascou aos de Lezkano un triplo de Brown, a tempo para a reacción celeste. Os tiros libres de Gerun levaron o duelo ao empate para o receso (39-39).
Seguiron presumindo de tres os lucenses na continuación. Os tiros libres de Redivo e dous tirples consecutivos de Cvetkovic déronlle ao Breogán a súa máxima vantaxe ata o momento (48-39). Parou o xogo Fisac, pero pouco puido facer para deter a un Breogán desatado desde o 6,75. A diferenza creceu ata os 15 puntos e os de Zaragoza se desquiciaban por momentos.
As rotacións axustaron a un e a outro e frearon a sangría, que se reduciu ata os 11 puntos a tempo para o último ataque. O partido seguía polos mesmos camiños ao comezo do último parcial. Cvetkovic e Vidal castigando aos aragoneses desde o triplo, os de Fisac intentando engancharse por medio do talento de Berhanemeskel. Recortaron os visitantes ata os sete puntos antes de que Lezkano parase o xogo. Sentou a Redivo e a Cvetkovic e Barreiro e Martín deixaron a distancia a catro desde o tiro libre. O galego anotou un triplo decisivo que deixou aos maños a un punto. Outro de Okoye igualou o duelo a 80 puntos e unha canastra de McCalebb puxo por diante aos de Zaragoza a pouco máis dun minuto. A frustración apoderábase dos celestes, que remataron afundíndose.
Ficha técnica:
Breogán, 82: Cvetkovic (18), Vidal (6), Löfberg (5), Brown (11) e Gerun (10) -quinteto incial- Uriz (5), Belemene, Sulejmanovic (2), Redivo (18), Jordan (6), Díaz (1)
Zaragoza, 86: McCalebb (21), Justiz (6), Barreiro (7), Seibutis (4) e Radovic (4) -quinteto inicial- Martín (16), Okoye (6), Berhanemeskel (22), Santana, Alocen, Martí, Pradilla
Parciais: 17-19, 22-20 (39-39 ao descanso) e 27-18, 16-29