Varios alcaldes de concellos con menos de 5.000 habitantes valoran a iniciativa da Xunta, pero advirten de que non servirá para paliar o declive demográfico
04 novs 2018 . Actualizado ás 20:17 h.As axudas á compra de vivenda son benvidas, pero non servirán para fixar poboación. É a conclusión á que chegan varios dos alcaldes consultados pola utilidade do novo plan de vivenda para os próximos tres anos anunciado pola Xunta: unha bonificación de ata 10.800 euros para os menores de 35 anos que adquiran unha propiedade en concellos con menos de 5.000 habitantes. «Valoramos calquera cuestión que invite á compra de vivenda. Pero o tema non está en que se financie ou non, o problema no rural é estructural», resume José Ramón Barreal, rexedor do Partido Popular en Laza .
Galicia leva anos facéndose maior, co seu interior baleirándose e o censo en caída libre ante a perspectiva de perder máis de 140.000 persoas nos próximos 15 anos. O plan da Xunta pretende atallar o problema da vivenda e o declive demográfico no rural cun importe que no seu primeiro ano será de 200.000 euros en total, escasos para o alcalde nacionalista de San Sadurniño. «Como iniciativa é positiva. As axudas á compra e rehabilitación sempre son boas, pero neste caso vexo un acto propagandístico», lamenta Secundino García Casal, que pide «unha reflexión» sobre o estado do parque de vivendas nos concellos rurais. «A partida é moi baixa, apenas daría para unhas cen bolsas», engade o rexedor, tamén crítico con que o prazo para a solicitude destas bonificacións esgótese en menos dun mes.
Os alcaldes de Laza e San Sadurniño, localidades que non acadan os 3.000 empadroados, coinciden en que ninguén se mudará a unha zona rural por recibir 10.000 euros. «Eses cartos axudan, pero non serán o que os empuxe a facelo», apunta Barreal. «Debe ser máis cantidade e acompañada por outras políticas para o medio rural», apoia García Casal, que reclama evitar «o desmantelamento do sector primario». «Con isto non se revirte a tendencia demográfica», subliña.
Maior pesimismo mostra Manuel Martínez, alcalde de Becerreá e exvicepresidente da Deputación de Lugo. O rexedor, que tras a súa expulsión do PSOE presentarase liderando unha lista independente nas próximas eleccións, vaticina que a medida «non vai ter repercusión» no seu concello nin no resto da comarca. Martínez entende que a maioría de persoas ás que afecta a bonificación vive aínda no domicilio familiar ou non ten ingresos suficientes para poder adquirir unha propiedade. «Son precisas outras políticas para atraer poboación», recalca en liña cos rexedores de Laza e San Sadurniño.
Unha oportunidade
O concello de Dozón , na comarca do Deza, é o paradigma da perda de poboación no interior galego. O seu alcalde, o popular Adolfo Campos, leva trinta anos no cargo vendo como o censo se vai reducindo exponencialmente. Entre os anos 2007 e 2017, liderou a redución de habitantes nos concellos da comunidade cun 38,7 %. «Calquera actuación que se adopte para fomentar o incremento da poboación e a actividade no rural é positiva», responde o rexedor, que valora a medida para que «a xente nova se quede nos concellos». Campos lembra que desde o seu concello se outorgan bonificacións para a natalidade de 500 euros e axudas para a compra de material escolar.
A situación xeográfica permite a Boqueixón ser un dos municipios susceptibles de beneficiarse desta subvención. Limítrofe con Santiago de Compostela, os mozos en busca de vivenda poderían atopar aquí unha oportunidade. Así o cre o seu alcalde, Manuel Fernández Munín, que ve no plan da Xunta un xeito de fomentar «asentarse e quedarse definitivamente». O popular argumenta que no concello «hai moita vivienda vacía». O principal exemplo está no lugar de Lestedo, onde se levantou unha urbanización con pisos «baleiros ou en mans de entidades bancarias» a prezos que roldan os 60.000 euros.
Escepticismo das inmobiliarias
O plan de bonificacións é insuficiente para a Federación Galega de Empresas Inmobiliarias (Fegein). «Esa política de dar diñeiro en tan pouco tempo e para este fin paréceme demagoxia política. Unha gota no deserto», carga Benito Iglesias , presidente da patronal galega. Desde a Fegein advirten de que existen uns 250 concellos «aos pés dos cabalos», onde a compravenda é case inexistente, fronte á intensa actividade das sete cidades e as súas áreas de influencia. Segundo os datos do Ministerio de Fomento, en Galicia hai 84 concellos onde non se vendeu unha soa vivenda nova nos últimos cinco anos.
Iglesias tamén critica a contía das axudas e a falta de políticas demográficas máis ambiciosas para o rural. «Nun pobo con menos de 5.000 habitantes, onde non hai infraestruturas, nin garderías, nin servizos sanitarios, que mozo vaise mudar alí?», protesta. Iglesias sinala que o plan «non serve de nada» sen ir acompañado de xeración de emprego.