«Estivo cheo de xente con moitos anos de transporte detrás, moitas historias polas estradas. A verdade e que foi moi emocionante», din desde a organización
04 novs 2018 . Actualizado ás 14:04 h.A primeira concentración de camións de Ortigueira, celebrada desde o pasado venres ata este domingo na Alameda, resultou todo un éxito. «O pobo apoiounos por completo, o ambiente foi inmellorable», confirmou Jorge Fernández, cabeza visible da organización. En total, a vila ortegana recibiu a 85 vehículos, procedentes, ademais da zona, de Ferrol, Santiago de Compostela, Baralla e mesmo de Asturias, de San Tirso de Abres ou Vegadeo, entre outros moitos lugares.
Os camións empezaron a aparcar en Ortigueira o venres, pero foi o sábado cando se viviu a maior festa. Ás 12.30 saíron en comitiva en dirección a Espasante e máis tarde regresaron ao momento inicial para vivir a sesión vermú, seguida dunha comida de confraternización. Durante a noite actuaron o grupo Paixón e a orquestra Principal como parte da verbena. Ademais, houbo exposición de coches de rali e actividades para os máis pequenos. Mentres, este domingo hai novamente unha sesión vermú.
«Estivo cheo de xente con moitos anos de transporte detrás, moitas historias polas estradas. A verdade e que foi moi emocionante», concluíu Jorge, que xa pensa na segunda edición.