A agrupación naronesa é un dos emblemas do municipio en celebracións diversas
14 ago 2022 . Actualizado ás 05:00 h.Para calquera veciño da zona de Ferrolterra é difícil non ter escoitado nalgunha ocasión algunha das agrupacións dependentes da Asociación Cultural Musical Sementeira en eventos deportivos, festas, concertos, certames ou procesións, entre outros. A traxectoria desta asociación está fortemente vinculada á vida social da comarca, e isto ten moito que ver coa Xoven Banda de Narón, a agrupación máis lonxeva das que coordina Sementeira. A maioría dos integrantes da agrupación son alumnos da escola de música, tanto profesionais como afeccionados.
Ademais de ser o conxunto máis coñecido de Sementeira, a Xoven Banda tamén é un obxectivo a acadar polos estudantes da escola, que antes adoitan pasar polas filas da Banda Infantil. Para Mariña Ramos, integrante da agrupación, «as clases de instrumento son moi divertidas, pero o mellor de todo é estar na banda». Con eles, esta moza música tocou recentemente na Semana Santa de Ferrol ou nas festas do Corpus, en Malpica.
Pero a Xoven Banda non é o único prato forte que pode ofrecer Sementeira: desde a Banda infantil preténdese que os estudantes da escola dean os seus primeiros pasos na música en conxunto a través dun repertorio especialmente atractivo para eles. Aínda que non ten unha axenda tan dinámica como a da Xoven Banda, tamén ofrecen concertos, como o que deron recentemente fronte ao centro de maiores Manuela Pérez Sequeiro.
Repertorio moderno
De máis recente aparición é a Banda do garaxe, un conxunto de menor dimensión para tocar en espazos aos que a Xoven Banda non podía acceder polo seu tamaño. Cun repertorio formado por música moderna e alegre, no seu historial xa conta con actuacións en eventos como o Pantín Classic, a Fashion Night de Ferrol ou, hai só uns meses, na Primeira Andaina Social Inclusiva do Concello de Narón.
Por ser unha organización sen ánimo de lucro, a actividade de Sementeira é posible grazas ao traballo dos integrantes das bandas e da escola e dos seus pais. Alicia Romero é a secretaria, e explica que «cada un aporta o que pode». Cada socio da asociación implícase na medida das súas posibilidades, e isto é especialmente importante en momentos do ano como leste. «Agora que comeza o período de matrícula temos que invertir moito tempo para sacalo adiante». A colaboración de todos é imprescindible pero, aínda que o tempo que hai que dedicar é moito, o resultado é moi agradecido. Para Romero , «a música é algo moi bonito, ves tocar aos rapaces e poñénseche os pelos de punta, paga a pena porque o que queren é aprender e tocar». Destaca que é un traballo en simbiose, xa que os estudantes da escola implícanse e interesan, e os profesores fan o seu traballo con total dedicación e devoción.
O período de matrícula de Sementeira ábrese o 30 de agosto, e pecha o 9 de setembro.