Seis anos de prisión e 142.000 euros de multa para un taxista veciño de Narón que levaba dous quilos de heroína
NARÓN
O agora condenado levaba a droga oculta na tapicería dos asentos dianteiros
01 dic 2021 . Actualizado ás 21:42 h.A Audiencia Provincial da Coruña condenou a seis anos e un día de prisión e unha multa de 142.132 euros a un taxista natural de San Sadurniño e domiciliado en Narón que transportaba no seu vehículo dous quilos de heroína. Na mesma causa figuraba como acusado outro home que resultou absolto.
Na sentenza, que xa é firme, considérase probado que o 11 de abril do presente ano, o taxista foi interceptado por axentes da Policía Nacional na saída de San Sadurniño da autovía AG-64. Nunha inspección do vehículo descubríronse catro paquetes que levaba ocultos tras a tapicería dos asentos do condutor e do copiloto, que contiñan preto de dous quilos de heroína, destinada á venda a terceiras persoas.
O home foi detido e permanece no cárcere desde o día 13 de abril.
A Fiscalía solicitaba para el a pena de oito anos de prisión por un delito contra a saúde pública por tráfico de drogas na modalidade de sustancias que causan grave dano á saúde, concorrendo o subtipo agravado de notoria importancia, aínda que, finalmente, a Audiencia rebaixou a pena a seis anos de cárcere.
O acusado declarara no xuízo que descoñecía que os paquetes que lle encargaron trasladar desde a Meseta a unha casa de prostitución na zona de Ferrol contiñan droga, pero na sentenza conclúese que o método utilizado confirma a tese de que era perfectamente coñecedor do que transportaba, ao que se suma o feito de que xa fora detido anteriormente polo mesmo delito.