O grupo postal remite ao novo espazo que abrirá a próxima semana no Alto
23 ene 2020 . Actualizado ás 05:00 h.Correos prosegue cos cambios para implantar o novo modelo de oficinas. Ao traslado da delegación naronesa do antigo consultorio de Piñeiros ao barrio do Alto súmase o peche do espazo situado no centro comercial de Alcampo. Desde o grupo postal sinalan que coa apertura da nova oficina «atenderase cunha mellor experiencia aos veciños de Narón e aos clientes actuais da sucursal de Alcampo, que terán este novo local na rúa Garda».
O peche esta previsto para o vindeiro mércores 29 e as críticas aumentan entre os usuarios da sucursal, da que destacan a súa boa localización dentro do espazo comercial e o seu numeroso aparcadoiro. «Pechan unha oficina cun horario flexible e con doado aparcadoiro para abrir nun lugar cun acceso horrible e escaso aparcadoiro. Como se van levar paquetes de moito peso así?», lamentaba unha usuaria.
Con todo, desde Correos destacan a mellora do servizo que se ofrecerá no novo local. «Estamos convencidos de que suporá unha mellora significativa para todos os veciños da área: tanto por superficie, pasaranse duns cen metros a cincocentos; como por tipo de local, será unha oficina luminosa, totalmente accesible e moderna; como por localización, queda situada nunha rúa máis céntrica, en pleno centro urbano, con máis tránsito», defenden desde a empresa.
Os 3 traballadores, recolocados
Anuncian que as novas instalacións do Alto abrirán as súas portas a próxima semana. Pola súa banda, a sucursal de Alcampo deixará de operar o mércores e os seus tres traballadores en persoal serán recolocados en oficinas de Correos de Ferrol.
En Narón poderase adquirir billetes de tren, abonar impostos ou sancións de tráfico
Correos ultima a posta en marcha do novo espazo que estreará un «novo concepto de oficina postal». Disporá dunha ampla gama de produtos para o envío e recollida de correspondencia e paquetería. Ademais, ofrecerá múltiples servizos para cidadáns e empresas como o rexistro de documentación ante a administración pública, a compra de billetes de tren, o abono de impostos, recibos de compañas, sancións de tráfico, recarga de móbiles, a compra de entradas para espectáculos ou concertos.