As casas do maior de Valdoviño e Moeche, listas para recibir aos primeiros usuarios
MOECHE
Cada centro pode atender a cinco persoas, maiores de 60 anos, que deben tramitar a súa solicitude a través dos departamentos de Servizos Sociais
27 ene 2022 . Actualizado ás 05:00 h.As dúas primeiras casas do maior da comarca —Casa Anduriña, en Meirás (Valdoviño), e Casa Branca, en Moeche — xa están listas para recibir aos primeiros usuarios. Cada unha dispón de capacidade para atender a cinco persoas, de acordo co establecido pola Consellería de Política Social. Van dirixidas a maiores de 60 anos con grao de dependencia uno ou dous recoñecido, ou non dependentes. Estes últimos deben dirixirse igualmente ao departamento municipal de Servizos Sociais e solicitar unha praza. Serán valorados e Política Social decidirá quen acode a estes centros (veciños de cada municipio onde se sitúan), de xeito gratuíto e con servizo de transporte se é necesario. É compatible con recibir servizo de axuda a domicilio.
Sonia Fernández Pena, ferrolá de 45 anos e veciña de Meirás desde fai 17, é a promotora de Casa Anduriña, operativa desde o 5 de xaneiro. «Aínda que non sexan dependentes, pode apetecerlles vir porque non queren estar todo o día sos, para ter relación social, poder comer todos xuntos e realizar mantemento físico, con ximnasia, e tamén mental, a través de distintas actividades», subliña a promotora desta iniciativa en Meirás. Sonia, con experiencia en atención a maiores, ten ganas de «arrincar» esta nova e «ilusionante» etapa profesional e vital.
Tras as obras executadas, o baixo da súa vivenda hase convertido nun espazo diáfano, luminoso e acolledor, ao que lle falta o máis importante, «as persoas». «Estou moi contenta de como quedou e agardo que isto axude a que a xente non teña que irse de Valdoviño», dicía onte, cando recibiu a visita do alcalde, Alberto González.
En Moeche tamén finalizaron os traballos de acondicionamento da Casa Branca, cedida polo Concello a Vanessa Toro Rodríguez (Verín, 31 anos), veciña deste municipio. «Xa tiña dúas persoas apuntadas e unha que estaba en dúbidas, pero de momento aínda non lles veu a valoración [da Xunta]. Na provincia de Lugo parece que vai máis rápido, aínda que nos dixeron que ían intentar aceleralo», apunta esta graduada en Administración e Finanzas, sen formación específica sobre maiores, pero «con moita afinidade con eles». Axudou a coidar aos seus avós e deu clases de informática, como voluntaria, a persoas da terceira idade.
Vanessa falou coas familias que mostraron interese neste servizo para informarlles da necesidade de «facer o trámite a través da traballadora social do Concello». Ela tamén está ansiosa por empezar a ver actividade no centro.