As PCR confirmaron 78 novos positivos de covid nun día na área sanitaria de Ferrol
FERROL CIDADE
Os ingresados na planta de hospitalización e a uci do Arquitecto Marcide suman xa 19
28 jul 2021 . Actualizado ás 21:37 h.A curva da pandemia segue subindo na área Sanitaria de Ferrol. Segundo o informe facilitado este mércores polo Sergas, os casos activos subiron de 834 a 885 en só unha xornada e nas 453 PCR realizadas confirmáronse 78 novos contagios. A cifra de hospitalizados tamén sobe, pasando de 13 a 14 ingresados na planta covid do Arquitecto Marcide e de 4 a 5 na unidade de coidados intensivos. A cifra de vítimas mortais mantense en 220.
Desde o inicio da pandemia víronse afectados polo coronavirus 9.836 veciños das comarcas de Ferrolterra, Eume e Ortegal, dos que 8.725 lograron superar a enfermidade. Realizáronse un total de 161.125 PCR, 19.380 probas de antígenos e 64.735 doutro tipo.
Por concellos, Ferrol sobe de 198 a 203 novos positivos confirmados nos últimos sete días e de 345 a 359 no acumulado de dúas semanas; Narón pasa de 86 a 89 e de 144 a 148 nos mesmos períodos; Valdoviño baixa de 17 a 14 e de 21 a 20; Cedeira tamén baixa de 15 a 14 nunha semana pero sobe de 22 a 24 no cómputo de dous; Cariño baixa de 26 a 25 e sobe 27 a 30 en 14 días; Ortigueira, baixa de 19 a 17 nunha semana e sobe de 27 a 29 en 14 días; As Pontes baixa de 46 a 45 e sobe de 52 a 54 no cómputo de dúas semanas; A Capela sobe de entre 1 e 9 a 10 e de 11 a 12; Neda pasa de entre 1 e 9 a 10 e de 14 a 16; Fene sobe de 15 a 28 e de 38 a 51; Mugardos mantense entre 1 e 9 a sete días e baixa de 12 a 11 no acumulado de dúas semanas; Ares segue con entre 1 e 9 casos nunha semana e sobe 13 a 17 en dúas; e Pontedeume tamén sobe de 24 a 25 e de 32 a 36. Pola súa banda, Mañón ten cero novos casos no cómputo dunha semana e entre 1 e 9 en dúas; e Cerdido, San Sadurniño, Monfero e Cabanas móvense na pinza entre 1 e 9 tanto nunha semana como en dúas. Os únicos municipios que seguen sen contagios son As Somozas e Moeche.