A firma de roupa escolle de novo a costa ferrolá para unha campaña promocional dunha das súas coleccións
28 jun 2021 . Actualizado ás 05:00 h.Apenas estamos celebrando a chegada do verán, e do bo tempo, e a marca de roupa Pull&Bear sabe como evocar o sentimento na súa campaña Tropical Summer. Mestura xuvenís pezas de roupa con estampados floreados e coloridos e texturas frescas para as temperaturas desta época do ano; con divertidos complementos como os populares aneis de cores deste tempada, lentes de pasta de estilo anos 2000, con modelos que xogan acompañado de froitas exóticas, toda nunha praia infinita paradisíaca de augas azul turquesa. Pero, se se fixa un pouco máis detalladamente no escenario, o areal onde se realizaron as fotografías, posiblemente recoñézao. Trátase da praia ferrolá de Doniños.
A rodaxe das imaxes da campaña, que se publicaron a través dos perfís da firma nas súas redes sociais de Facebook e Instagram e na súa páxina web, colleu desprevidos aos bañistas que gozaban dun día de praia e moitos saen como improvisados extras nas imaxes. E non é a primeira vez que a filial de Inditex , con sede no polígono naronés de Río do Pozo, opta por non saír da casa para escoller a localización para promocionarse. A praia valdoviñesa de Campelo ou o areal ferrolán de Santa Comba foron igualmente escenarios de dúas coleccións de outono desta marca. Talvez, a campaña que máis atracción espertou foi a de Marc Márquez, o campión de motociclismo que se desprazou ata Valdoviño, concretamente aos cantís da parroquia de Meirás coa capela do Porto ao fondo, para fotografar a súa colección de roupa para a firma. E é que a comarca inspira á moda.