O procedemento que afecta a 2.000 veciños de Covas, Esmelle, Mandiá e Marmancón pecharase este mes
04 jun 2021 . Actualizado ás 05:00 h.Ao bordo de cumprir as catro décadas, a concentración parcelaria de Ferrol está a piques de pór fin a un longo camiño infestado de dificultades. Os propietarios de chan afectados polo proceso para reagrupar terreos e pór coto ao minifundismo recibirán este mes os títulos das súas novas propiedades. As 23.000 parcelas iniciais reducíronse a unha quinta parte. E o número de veciños afectados supera os 2.000. Pertencen a Covas, Mandiá, Marmancón e Esmelle, o ámbito que abarcou o proceso. E será nos seus locais sociais onde, en cuestión de días, poderán ao fin recoller de mans da Xunta os documentos que os acreditan como novos donos.
Despois de tanta espera, «estamos contentos de que se finalice», admite o presidente veciñal de Covas, Manuel Sendón. Unha «alegría» que non oculta as vicisitudes e o atraso acumulado. O máis recente, o motivado pola pandemia, porque en marzo do pasado ano estaba previsto que estes títulos puidesen estar xa en notaríaa. Pero non puido ser e o punto final acumulou unha nova demora. Pero antes chegaron moitas outras. Como as burocráticas. Ou informes de Costas e Medio Ambiente que enquistaron durante anos un proceso que arrincaba en 1983, e ao que dous anos despois se incorporaba Mandiá.
O resultado é que máis dun terzo dos propietarios iniciais -segundo os datos que manexaba a Xunta en 2015- faleceron antes de ver culminada a reordenación dos seus terreos. Agora son os seus herdeiros os enredados nun proceso que deixará algúns flocos soltos. Os veciños estiman que varios centos de títulos non poderán ser entregados, ao non estar debidamente cumprimentados coa documentación necesaria. E que quedarán á espera de herdeiros ou propietarios póñanse posteriormente en contacto coa Xunta. E os que si estean listos pero non sexan recollidos polos interesados, poderán ser reclamados no edificio administrativo da Xunta na Coruña, na zona de Monelos.
«Despois de corenta anos», apunta Miguel Parra, presidente veciñal de Esmelle, a entrega dos títulos «é un gran paso», admite. Pero lembra que moitos veciños venderon, falecido ou cambiado a titularidade, polo que aínda que agora se entreguen os títulos «hai moita xente que ten que facer a posta ao día, e levará tempo». Con todo, «é un paso importantísimo para que se acabe dunha vez con esta parcelaria que naceu cun fin que non chegou a cumprir». Parra explícao: «Estaba pensado para reorganizar terras para que se puidese continuar a actividade agrícola. E ao final, cando chegou, case non existen nin os agricultores», argumenta.
Documentación necesaria
A entrega dos títulos realizarase entre os días 14 e 29 nos locais sociais de cada parroquia. Poderán ser retirados polos interesados ou outra persoa no seu nome, presentando DNI da persoa que o retira e a autorización do propietario. Ademais, no caso dos herdeiros, representantes veciñais como Manuel Sendón recomendan acompañar toda a documentación que sexa posible para evitar problemas á hora da recollida, incluído o testamento, o certificado de defunción, unha fotocopia do DNI do falecido e a identificación oficial de quen acudan a por os títulos.
A concentración parcelaria en datos
- A superficie afectada: 2043 hectáreas. É a extensión dos terreos sometidos ao proceso en Covas, Esmelle, Marmancón e Mandiá.
- Os beneficiarios: 2.125 propietarios. É o número de persoas con terreos no ámbito da concentración.
- As parcelas: 5.004, un 22 % das iniciais. Antes eran 22.957. O proceso supuxo un investimento en conxunto de 5,2 millóns de euros.