Catro casos activos máis e un hospitalizado menos por covid-19 na área sanitaria
FERROL CIDADE
Ferrol empeora, con seis contaxiados máis na marxe de sete días, e os demais concellos melloran ou se manteñen
08 may 2021 . Actualizado ás 17:43 h.O número de casos activos de covid-19 na área Sanitaria de Ferrol creceu lixeiramente, acadando os 91, catro máis que a véspera. Con todo, baixou a cifra de hospitalizados, sete, un menos, e segue habendo dúas persoas ingresadas na uci, de acordo cos datos facilitados polo Servizo Galego de Saúde (Sergas), correspondentes ás 24 horas previas ás seis da tarde do venres. Nese período recibiron a alta médica cinco pacientes de coronavirus , polo que xa son 8.152 os curados nas comarcas de Ferrolterra, Eume e Ortegal. Desde que comezou a pandemia faleceron 217 persoas por esta enfermidade e contaxiáronse 8.466.
Entre as seis da tarde do xoves e a mesma hora do venres confirmáronse seis novos casos por probas PCR, e en todo o período se realizaron 137.736, ademais de 44.032 de tipo serológico.
Na análise por concellos, obsérvase un aumento dos positivos en Ferrol no cómputo dos últimos sete días, con 17 casos, seis máis que na xornada previa, e unha leve baixada na franxa de 14 días, con 23, un menos. Melloran, na pinza de sete días, Mañón, Ortigueira, Cedeira, Narón e Ares, que pasan de entre un e nove casos a cero. Estes cinco municipios continúan con entre un e nove contaxiados na marxe de 14 días. Valdoviño tamén ofrece mellores datos en 14 días, con cero casos (estaba en entre un e nove), e segue a cero en sete.
Entre un e nove no cómputo dunha semana e de dúas permanecen Cariño, Fene, Pontedeume, Neda e Mugardos; e sen ningún caso activo seguen Moeche, As Somozas, As Pontes, A Capela, Monfero e Cabanas. En Cerdido e en San Sadurniño tampouco hai cambios. Ambos se manteñen con cero casos na última semana e entre un e nove, na pinza de 15 días.