O covid volve a municipios da comarca que nos últimos días estaban libres do virus
FERROL CIDADE
Aumentan os positivos confirmados, de novo por amais do centenar na área Sanitaria de Ferrol
29 abr 2021 . Actualizado ás 12:02 h.Dos trece municipios que o mércores non presentaban novos casos activos de covid, nove mantéñense libres de infeccións no último balance de Sergas . Pero outros catro volveron a contabilizar afectados polo virus, mentres a área Sanitaria de Ferrol tamén constata un novo repunte, ao pasar de 98 a 105 infectados. Os concellos que volven rexistrar infeccións activas nunha semana son Mañón, Cariño, Cerdido e San Sadurniño, que se moven na pinza de entre un e nove enfermos.
Nas últimas 24 horas, os profesionais sanitarios realizaron 375 probas PCR, das cales sete (un 1,9 %) guindaron un resultado positivo, polo que, sumados ao total de infeccións confirmadas, na comarca contaxiáronse polo menos 8.421 persoas desde marzo do ano pasado. Delas, 8.094 foron dadas de alta, pero 216 perderon a vida.
Nas plantas do Complexo Hospitalario Universitario de Ferrol (CHUF) non hai cambios en canto á presión asistencial, polo que oito persoas seguen ingresadas e outras dúas permanecen na unidade de coidados intensivos.
Municipios
Os nove concellos que seguen sen novos diagnósticos na última semana son Cabanas, Pontedeume, Monfero, As Pontes, Moeche, Cedeira, A Capela, Ortigueira e As Somozas.
Entre un e nove casos, ademais dos catro municipios xa citados, está Narón (12 casos en dúas semanas), Fene, Neda, Mugardos, Ares (once casos en dúas semanas) e Valdoviño.
En Ferrol baixan os casos activos respecto ao reconto da xornada anterior. Son 16 nunha semana (dúas menos) e 33 en 14 días (dous menos).