«Con estes horarios é imposible, o que buscan é que o tren vaia a peor para acabar pechándoo»
FERROL CIDADE
Usuarios do ferrocarril de vía estreita, alcaldes e plataforma esixen que se restablezan os servizos previos á pandemia
23 sep 2020 . Actualizado ás 05:00 h.A Plataforma pola Defensa do Ferrocarril Ferrol-Ribadeo leva anos alertando do «deliberado» abandono do servizo cun único obxectivo, a súa desaparición. E leva anos formulando propostas para mellorar o seu funcionamento e garantir a continuidade dun medio de transporte vital para moitos veciños das comarcas de Ferrolterra, Ortegal e A Mariña lucense, que carecen dun transporte público alternativo para acudir ao seu posto de traballo, o seu centro de estudos ou o seu hospital de referencia.
O tempo e a inacción de Renfe parecen querer darlle a razón á plataforma. Os usuarios comparten os vaticinios máis adversos. «Con estes horarios é imposible, o que buscan é que o tren vaia cada vez a peor para acabar pechándoo», sostén unha veciña de Moeche que durante máis de 15 anos desprazouse a diario en tren ata Ferrol para traballar. «Agora sírveme o de volta, pero o de ida non, e estou mirando se teño bus para ir e poder volver en tren, pero dáme que van acabar quitando o tren», teme .
Esta viaxeira defende o ferrocarril «porque é máis económico e máis respectuoso co medio ambiente, e porque non tes problemas para aparcar». Iso si, remarca, «sempre que non te deixe tirada cada dous por tres, e que os horarios sexan razoables». Ela ten a opción de utilizar o coche, pero coñece a outras dúas veciñas con emprego na cidade naval «que non teñen carné de conducir e non saben que facer». A Sameira, unha moza de Moeche que estuda no IES Leixa, en Ferrol, tampouco queda opción: «Empezo o curso, ao non haber tren estou a mirar como facer... Como non me leven en coche...».
Redución dun 75 %
Durante o estado de alarma, Renfe reduciu un 75 % dos servizos entre Ferrol e Ribadeo, deixando só una das catro frecuencias diarias en cada sentido e sen data de recuperación, que vinculan sempre ao eventual aumento da ocupación, «esa que Renfe nin quere recoñecer nin ten medios para coñecer», como denuncia a plataforma.
Este colectivo ve «un desmedido interese de Renfe e das Administracións responsables para destruír definitivamente o noso tren», que se evidencia estes días, co inicio do curso, sen que se reforzou nin o máis mínimo o servizo. Esixe que se repoñan, de forma urxente, as saídas de Ortigueira a Ferrol das 6.35 horas e Ferrol-Ortigueira das 20.05; e en media distancia, os trens de Ribadeo a Ferrol das 6.55 e as 15.00, de Oviedo a Ferrol das 14.30, de Ferrol a Ribadeo ás 10.45 e as 19.05, e de Ferrol a Oviedo das 15.30.
Mentres a plataforma emprende unha campaña para solicitar apoios en change.org , os alcaldes dos concellos afectados «pola lamentable e inexplicable situación do servizo ferroviario» seguen á espera da resposta de Renfe á súa última solicitude de reunión urxente. No escrito falan da «intolerable redución dos servizos» e demandan «unha solución inmediata».
O rexedor ferrolán, o socialista Anxo Mato, lémbralle a Renfe «que ten unha obrigación de servizo público que ten que cumprir, e que no único tren de proximidade que hai agora en Galicia, Ferrol-Ortigueira, Renfe debe reconsiderar a posibilidade de repor todas as frecuencias, fundamentais para poder ofrecer un servizo público básico».