As Pontes apagou a luz durante unha hora para pedir solucións á crise da térmica
15 novs 2019 . Actualizado ás 05:00 h.A central térmica das Pontes acumula xa oito meses practicamente sen actividade, debido á súa falta de competitividade polo incremento do prezo dos dereitos de emisión de CO2 e fronte a outras tecnoloxías, como as renovables ou o gas. Nestas últimas semanas desenvolvéronse probas para avaliar a operatividade da factoría queimando unha mestura de carbón e outros materiais, como refugallos vexetais ou lodos de depuradoras. Iso permitiu que unha vintena de transportistas, que se ocupan de trasladar o mineral desde o porto exterior ferrolán ata a vila mineira, traballasen nestas tarefas nas últimas semanas.
Con todo, esa faena remátase hoxe, e a parálise volve ser total. «Iso foi unha miraxe», asegurou Manuel Bouza, portavoz dos transportistas, quen anunciou que hoxe mesmo se reunirá a xunta directiva da entidade para abordar o novo escenario.
Con todo, o que teñen ben cuantificado é o impacto económico que está tendo este parón nos seus petos. «Xa deixamos de ingresar 14 millóns de euros, e a situación agrávase cada día máis. Non só o están pasando mal os camioneiros, senón tamén os bares, as casas de comida e os comercios», afirmou Bouza.
Ademais, subliñou a incerteza que hai sobre o futuro a curto prazo da central de Endesa. «As probas seguen a medias, non se sabe nada», engadiu, ao mesmo tempo que subliñou que os transportistas van manter os peches nos concellos das Pontes e Ferrol, que xa cumpriron tres meses.
Mobilización
De feito, onte As Pontes viviu unha nova mobilización. Entre as oito da tarde e as nove da noite, os veciños apagaron as luces para reclamarlle a Endesa que concrete cales son os seus plans futuros para a térmica, despois de que a finais de setembro decidise acelerar o fin da súa vida útil. O apagamento foi xeral, xa que a administración local tamén baixou o interruptor durante ese período da iluminación pública.
Inicialmente estaba previsto que a protesta incluíse unha concentración na praza do Carmen, pero debido ao temporal decidiuse suspender esta última mobilización.
