Con protagonistas ferroláns
12 oct 2019 . Actualizado ás 14:59 h.Todos estiveron onte no camiño. David, Rocío e Javier, facían de figurantes para a campaña que sobre Ferrol está a preparar Turismo de Galicia. Un fotógrafo retrataba aos supostos peregrinos ante algúns dos símbolos do barrio da Magdalena, como a fachada da Casa Romero na Praza de Galicia, fronte ao Teatro Jofre e Correos. Eran conscientes de que se saíron do camiño, pero sempre merece a pena, para admirar unha das obras do arquitecto Rodolfo Ucha. Pronto veremos a promoción de Ferrol en folletos e publicidade. Eles serán os protagonistas.
Peregrinaxe escolar
A Federación de Anpas de Ferrol e comarca Concepción Arenal que preside Patricia Pérez, sacou onte á rúa a máis de 400 alumnos do colexio Isaac Peral a percorrer o primeiro tramo do camiño Inglés a Santiago. O obxectivo é que os escolares se convertan en prescriptores e coñecedores da ruta Xacobea e que sintan o orgullo de contar cun camiño que non só pasa pola súa cidade, tamén pola porta do seu colexio, en Esteiro. Nos próximos días outros moitos centros da comarca participasen nesta Peregrinación Escolar multitudinaria.
Escaparate colectivo
Non facían a ruta xacobea, pero estaban nel ao seu paso pola rúa Real. Son integrantes do grupo empresarial BNI Albatros. Os tres confluíron onte no escaparate de Men, a tenda de Fernando González. Os seus compañeiros de grupo deixaban alí a súa pegada. Xoel Rodríguez, de Xi Fotografía, encargouse dos paneis traseiros coa foto do propio Fernando exercendo como modelo da súa tenda. Gaby Ramos, de Bike Works, achegou o atrezo ao escaparate coa bicicleta que forma parte do decorado. O resultado, como sempre, rechamante e orixinal. Tres empresarios de Ferrol, Fene e Narón demostrando que a colaboración é posible e dá resultados. Así si, faise camiño.