Nos peiraos locais pasouse de mover 55 tipos de mercancías a preto de dous centenares
23 jul 2019 . Actualizado ás 05:00 h.O carbón de Endesa -nunha situación complicada na actualidade- continúa sendo un dos grandes alicerces nos que se asenta a actividade da Autoridade Portuaria Ferrol-San Cibrao. E aínda que os vaivéns neste mercado afectan aínda, e moito, ás cifras dos peiraos locais non é menos certo que o abano de mercancías é cada vez máis variado.
Na presentación da memoria oficial do pasado exercicio, tanto o presidente do organismo, José Manuel Vilariño, como o seu director, Alejandro Rey , fan unha reflexión conxunta na que sinalan que «polos nosos peiraos pasamos de xestionar 55 tipos diferentes de mercancías no ano 1997 a 181 no ano 2018». Ese é un dos fitos logrados ata o momento coa construción do porto exterior de Caneliñas como gran pano de fondo. Pero aspírase a máis. E puxéronse os alicerces para logralo. Cales foron os grandes fitos do pasado exercicio? Segundo o mencionado documento, os seguintes:
Inicio do tráfico de colectores
O pasado ano concretouse unha das grandes apostas da Autoridade Portuaria, colocar a Ferrol no mapa internacional do movemento de colectores. A activación da liña regular da naviera Mac Andrews para o complexo de Ferrol Container Terminal supuxo pasar de sete escalas de portacontedores no 2017 a 49 o pasado exercicio. E o que é máis importante, o mercado continúa activo e só nos primeiros cinco meses deste 2019 realizáronse xa un total de 36 escalas. Cifras moi modestas dentro do panorama nacional pero que se consideran o xerme para o bum dese mercado.
O ferrocarril
A bo ritmo, así van as obras da tan demandada conexión ferroviaria do porto exterior, imprescindible para o crecemento do movemento de colectores e tamén doutras mercancías. Cun investimento de case cen millóns de euros acométese na actualidade unha das fases máis complexas da tarefa, o túnel baixo os montes de Brión de case seis quilómetros de lonxitude. Ferrol-San Cibrao é, a día de hoxe, a única Autoridade Portuaria de toda a rede española que aborda unha obra ferroviaria desta magnitude.
Nova sede para a Policía de Fronteiras
Outra clave imprescindible para favorecer o movemento de colectores. As novas instalacións están moito mellor adaptadas para que o corpo poida exercer o seu labor de, por exemplo, velar polo cumprimento das obrigacións dos transportistas con respecto á cumplimentación de documentos ou remisión de información requirida.
Subministración de gas natural licuado a buques
Outra iniciativa que vai por bo camiño e que axuda a diversificar e a facer dos peiraos ferroláns unha peza loxística moi atractiva. Da man de Reganosa avanzouse neste tipo de subministración de gas natural licuado a buques que, en poucas palabras, permite unha reposición áxil e eficiente para un tipo de tráfico marítimo que aproveita este recurso como combustible e que vai a máis.
Un total de 13,7 millóns de toneladas
Foron un total de 13,7 millóns de toneladas de mercancías cargadas e descargadas nos peiraos locais e de San Cibrao, todos eles xestionados desde Curuxeiras, durante o 2018. Con estes números, Ferrol ocupa xa o décimo terceiro posto do ránking das 28 Autoridades Portuarias de toda España. queda con case o 37 % do tráfico portuario de Galicia e co 12,81 % do de todo o norte do país. E aínda non se otea o teito.