Tres adultos e unha menor resultan feridos en dous accidentes encadeados no Acceso Norte de Ferrol
FERROL CIDADE
O primeiro dos contratempos provocou retencións que derivaron noutra colisión por alcance entre tres vehículos, polo que os carrís da vía en dirección ao porto estiveron cortados preto de dúas horas
22 jul 2019 . Actualizado ás 23:58 h.Catro persoas trasladadas en ambulancias ao Complexo Hospitalario Universitario de Ferrol (CHUF) é o balance de dous accidentes de tráfico encadeados que se rexistraron pouco antes das 11.30 horas no Acceso Norte, nas inmediacións da saída facía a avenida de Santa Mariña. Trátase do condutor dun turismo, de 66 anos e cuxa identidade responde ás iniciais J.P.F., que tivo que ser excarcerado polos bombeiros e foi evacuado ao hospial nunha ambulancia medicalizada; e dunha muller de 65 anos, A.S.Ou., ademais e dunha menor, cuxos traslados se efectuaron en ambulancia asistencial, segundo a información facilitada pola oficina de prensa de Urxencias Sanitarias de Galicia. A cuarta persoa que tamén foi levada ao hospital nunha ambulancia é unha muller que viaxaba noutro vehículo.
O sinistro no que resultaron lesionadas a parella de sexagenarios e a menor consistiu nunha colisión por alcance do seu vehículo por parte dun camión e produciuse na curva existente uns metros máis adiante da saída cara a Santa Mariña, en dirección ao porto de Ferrol. Como consecuencia do mesmo producíronse retencións na circulación, que derivaron nunha segunda colisión por alcance entre tres vehículos á altura do pavillón polideportivo de Santa Mariña, na que resultou lesionada a outra muller.
Ambos os contratempos provocaron un importante despregamento dos efectivos da Policía Local de Ferrol e dos bombeiros, que tiveron que mobilizar a varios guindastres para proceder á retirada dos vehículos sinistrados. O tráfico estivo cortado en todos os carrís de dirección ao porto ata preto da unha tarde e os axentes municipais desviaron a circulación pola saída cara á avenida de Santa Mariña.