Só Rey Varela insiste na necesidade, «pensando no futuro de Ferrol», de lograr unha maioría absoluta «para evitar que se repitan os últimos catro anos»
15 may 2019 . Actualizado ás 10:03 h.Os candidatos á Alcaldía de Ferrol de dez dos once partidos que concorren ás municipais do 26M -VOX estaba invitado pero non acudiu- expuxeron onte ante o público que encheu o auditorio de Afundación as liñas básicas dos seus respectivos programas, nun debate aberto organizado por La Voz. Coas diferenzas propias de cada ideoloxía, todos eles coincidiron en diagnosticar os principais problemas aos que se enfrontará a nova corporación e tamén, case ao unísono, a posibilidade de que sexa necesario recorrer a pactos para constituír o goberno.
A primeira cuestión que se expuxo aos candidatos foi precisamente a de cal será a súa postura se non hai unha maioría absoluta. E José Manuel Rey Varela, que é o que, segundo as enquisas de Sondaxe, ten máis posibilidades de chegar ao ansiado número trece de membros no pleno, foi o único que se desmarcou do resto, sinalando que, «polo futuro de Ferrol», é conveniente «que non se repita o dos últimos catro anos».
O socialista Anxo Mato, que en función da citada consulta cidadá sería o chamado a ser alcalde, pero cun tripartito ou mesmo un cuadripartito, recoñeceu a situación na que se atopa, sinalando que «se votan ao PSOE, será a columna vertebral dun goberno que promete estabilidade e traballo para Ferrol».
Pola súa banda, Jorge Suárez, actual alcalde e candidato de Ferrol en Común, mostrouse disposto a pactar, «en base a programas concretos»; Iván Rivas, do BNG, dixo que os que se presentaron coa idea de maioría «xa perderon», sinalando que a única alternativa era un pacto do BNG con outra ou outras formacións de esquerdas»; e Alejandro Langtry, de Cidadáns, tamén apuntou a posibilidade de pactar ou apoiar.
En canto ao resto de cabezas de lista, Anicet Lavodrama, de Sentimento Ferrolán, anunciou que apoiasen ao candidato máis votado; Bernardo Lorenzo Cuétara, de Marea de Ferrol, asegurou que «debemos acostumarnos a que non vai haber maioría absoluta» e dixo aspirar a ser «o cemento dun goberno de esquerdas e a garantía de que vai durar catro anos»; Carlos do Río, de Xuntos Actúa, mostrouse disposto a pactar coa esquerda. Pola súa banda, Jorge Juan Álvarez, de Centristas, presentouse como integrante de «un partido de concordia», ao que só lle importa Ferrol e que os temas leven a cabo, independentemente de quen leve o mérito; e Iolanda Teixeiro, de Ligando, tamén dixo acceder a «pactos con calquera forza, menos con VOX».
Entre outras cuestións, os alcaldables trataron o problema da caída demográfica. A creación de emprego, a rehabilitación de vivendas, a potenciación do turismo, a accesibilidade, o fomento da conciliación e a mellora dos servizos son cuestións nas que coinciden a maioría.
Tamén se abordou a polémica taxa de saneamento, coa reprodución das posturas enfrontadas. Rey Varela botoulle en cara a Suárez que aprazase o cobro dos atrasos de dous anos para despois das eleccións; o alcalde lembrou que cando accedeu ao goberno a depuración estábase cobrando e non funcionaba; Mato apuntou que a magnífica noticia do saneamento habíase convertido nunha «lea inconmensurable» e Rivas insistiu en devolver a depuradora á Xunta.
