En Lugo, Ourense, Betanzos e Ferrol hai tres candidaturas do antigo espazo común
15 may 2019 . Actualizado ás 05:00 h.En xeral, os dous sectores enfrontados de En Marea que agora pugnan polo espazo local contan con mareas afíns ou contrarias segundo por quen cada agrupación local teña tomado partido ao longo dos catro anos de vixencia das devanditas plataformas, ou segundo cal das dúas fraccións teña sabido conquistar ás que se crearon nese tempo. Pero hai quince municipios nos que se duplican; é dicir, nos que hai candidaturas afíns a Villares e outras proclives a Podemos-EU-Anova. É máis, danse mesmo casos con tres en discordia porque, ou ben a marea orixinal vai pola súa conta e os sectores enfrontados crearon dous máis, como é o caso de Ourense, ou ben EU preséntase á marxe de Podemos, como ocorre en Lugo. Esta sopa de siglas xurdidas do que fai catro anos era un espazo común está a disposición dos veciños de Betanzos , Ferrol, Ames, Sanxenxo, Vilagarcía, Ponteareas, Cangas, Pontevedra, Baiona, Gondomar, Nigrán, Ourense, Lugo, Sarria e Marín.
As mareas promovidas por Podemos xunto con EU preséntanse baixo a marca Son En Común; na maioría delas intégrase tamén Anova, pero non en todas. O fracaso das negociacións para acadar unha candidatura conxunta para as xerais arrefriou as relacións e imposibilitou as alianzas nalgúns concellos nos que Anova xa gozaba de influencias. Alí onde a formación morada puido montar unha candidatura, fíxoo, pero á marxe do partido de Beiras.
As marcas Son En Común e Mareas Locais enfróntanse directamente en Sanxenxo, Ponteareas, Cangas, Pontevedra, Baiona, Gondomar, Nigrán e Sarria. Nos demais municipios, a división ten as súas características particulares. En Betanzos, por exemplo, Podemos e EU crearon unha lista propia á marxe de Betanzos Novo e de Betanzos en Común. En Ferrol, os críticos de Ferrol en Común montaron dúas novas plataformas: Xuntos Actúa e Marea de Ferrol. En Vilagarcía, En Común engloba a simpatizantes de En Marea e de EU, mentres que Marea dá Vila suma as siglas de Podemos e Anova.
Hai, ademais, mareas locais que se deixan querer polos dous sectores ou que tanto Anova como Podemos e En Marea axéncianllas. Na web de En Marea -sempre partindo da base de que cada marea é independente- enuméranse como afíns 57 agrupacións locais. Entre elas, Marea Cidadá de Noia , a cuxa presentación acudiu non só Xosé Manuel Beiras, senón tamén Carmen Santos, anterior secretaria xeral de Podemos Galicia. E na posta de longo de Contigo Podemos, en Ames, reuníronse os protagonistas das eternas pugnas internas de Podemos en Galicia. A lista que encabeza Gemma Otero enfrontarase, como fai catro anos, a Ames Novo, formación á que pertence a número dous de En Marea, Ana Seijas. Afíns ao partido de Villares son tamén as candidaturas que se presentan como Manifesto Miñor, que en Baiona, Gondomar e Nigrán enfróntanse ás de Son En Común.
As axendas de campaña dos líderes dos dous sectores enfrontados dan unha pista dos recunchos galegos nos que cada un é ou non benvido.
Podemos vai só en cinco concellos, EU mantén a súa marca en seis e Equo figura en dous
Gañemos, marca que inscritos de Podemos utilizaron no 2015, cando a formación morada non se presentou aos comicios locais, sobrevive en dúas localidades: A Coruña e Vilanova. Naqueles lugares nos que Podemos non foi capaz de chegar a acordos cos seus socios no espazo rupturista, a formación morada preséntase en solitario ou con EU, aínda que como non ten unha forte implantación fóra das cidades, só conformou listas con este modelo en Lugo, Betanzos, Marín, Ourense e Ames. Hai outras localidades nas que EU mantén as súas siglas na papeleta, xa sexa en solitario ou cos seus socios habituais, como ocorre en Cambre, Fene, Mugardos, O Grove, Ponteareas e Lugo; neste último caso, xunto con Equo.
A formación ecoloxista, alí onde se presenta, faino cos seus socios en Unidas Podemos; é dicir, con Podemos e con EU. Pero hai dúas excepcións. En Lugo, vai con EU á marxe da candidatura do partido morado que encabeza Josito Pérez. E en Teo preséntase Equo en solitario, aínda que a lista conta con representantes, entre eles o cabeza de cartel, que proceden do círculo local de Podemos. A dirección de Podemos Galicia non lles permitiu presentarse coa súa marca, oficialmente, por non ter cumprido co requisito das primarias, aínda que hai quen asegura que realmente foi para que non competisen con Son de Teo, o partido do actual alcalde, Rafa Sisto, militante de Anova e sucesor de Martiño Noriega na alcaldía teense.