Ferrolterra volverá recibir fondos para rehabilitar vivendas no Camiño Inglés

Unha pequena parte dos 2,9 millóns de euros consignados pola Xunta para axudar a pór a punto inmobles das rutas xacobeas, chegará este ano a Ferrolterra e Eume. A recente convocatoria de axudas pechouse cun total de 11 solicitudes de subvención por parte de propietarios de vivendas das localidades da comarca polas que discorre o Camiño Inglés. E aínda que a cifra non é elevada, supón un cambio de tendencia. Non en balde, en 2017 non se formalizou nin unha soa solicitude de axuda.

Detallan desde a Consellería de Medio Ambiente e Vivenda que ata o 31 de outubro presentáronse peticións de subvención para acometer melloras en catro vivendas situadas á beira do camiño de peregrinación en Ferrol, unha en Fene, tres en Neda e outra en Pontedeume. E engaden que neste último municipio, xa foi concedida unha axuda por importe de 8.247 euros.

A área de rehabilitación Integral Camiños de Santiago contempla axudas de ata 15.000 euros por vivenda, cubrindo un máximo do 45 % do orzamento preciso para executar as obras planificadas. As intervencións tratan de recuperar os inmobles situados á beira do Camiño, optimizando a vida dos seus moradores. A mellora de fachadas, a substitución de carpinterías ou a eliminación de humidades son algunhas das actuacións subvencionables.

---

---

---