Destacan pezas das culturas chinesa ou xaponesa
08 novs 2017 . Actualizado ás 05:00 h.Na galería Enrique Vázquez (rúa Sánchez Barcaiztegui) pódese ver ata finais do mes de decembro unha colección de antigüidades en grao sumo variada. Acompañando a mostra pictórica de Elicio Martínez a galería exhibe unha ampla variedade de diferentes pezas adquiridas en anticuarios ou procedentes da propia colección da familia de Vázquez. «A miña paixón por este mundo vén do meu pai, que se dedicaba á arte antiga. Moitas destas pezas son da miña colección privada», indica o galerista.
Entre os curiosos obxectos pódense ver netsukes, «uns botóns de marfil que se puñan nos traxes de gala da cultura chinesa ou xaponesa», explicou. De feito, estas civilizacións son protagonistas de varias pezas desta colección. Outros elementos son os botes de rapei. «Son de materiais como jade, cristal ou vidro, que se utilizaban para nifrar o po de rapei», detalla.
Pero estes son só dous exemplos dunha ampla exposición que inclúe reloxos de pel de finais do século XVIII, cómodas de caoba, mobles art decó, mobiliario de época, xoieiros chineses ou baúis de alcanfor.
As pezas están a exhibición pero tamén poden adquirirse. A exposición pódese visitar de luns a venres en horario de 10.00 a 13.00 horas e de 17.00 a 20.30 horas, e os sábados pola mañá de 10.00 a 14.00 horas.