Detrás dos mellores croissants de Ferrol está un dos que apuntan máis alto no «fitness» nacional, César Varela Gárate
16 oct 2017 . Actualizado ás 16:43 h.Asegura que non é a súa opinión, senón a dos seus clientes: os croissants da confeitería París son os mellores que se poden atopar en Ferrol. O negocio ten dous establecementos, un na rúa Dolores e outro no barrio de Caranza, onde se atopa o obrador e tamén César Varela Gárate, un dos deportistas que apuntan máis alto no fitness español. Hai apenas un ano que empezou a competir, pero a súa recente vitoria entre as promesas do Arnold Classic, un dos eventos internacionais con maior repercusión, púxoo no mapa da modalidade Men's Physique. Ademais, proclamouse campión galego e esta fin de semana foi quinto entre os de máis de 178 centímetros no Campionato de España.
Cando tiña 17 anos -en xullo cumpriu 26- deuse a casualidade de que empezou a traballar nas que agora son as súas paixóns: a repostería e o fitness. «Os meus pais tiveron o negocio toda a vida e sempre estiven metido na pastelería dun xeito ou de outra», conta César, que deixa un intre a masa dos croissants para atender a La Voz. «Realmente, non hai ningunha fórmula secreta, porque os ingredientes son moi básicos. Deben de ter algo, debe ser o amor co que se fan, que son moi ricos», di sobre o seu produto estrela. O mesmo ocorre co seu físico, para o que non existe ningunha poción máxica. «Moito sacrificio e moito traballo. Non hai milagres, só se trata de ser constante e facer as dietas e os adestramentos cando toca», explica. Iso si, deixa claro que as súas dúas ocupacións «esixen dedicación, pero son cousas moi opostas».
De feito, en época de competición, os pasteis non aparecen de ningunha maneira nas seis comidas que fai ao día e que prepara ben cando se levanta, ben ao longo da xornada. Ás 6.45 da mañá sóalle o espertador e ás oito xa está na confeitería. De alí, onde tamén despacha, non se vai ata as dúas. Pola tarde tamén está, de 16.30 a 18.30. Dúas horas despois, a partir das 20.30, entra no ximnasio, o Factory Gym de Ferrol, e traballa o seu corpo ata as dez da noite. «Adestro todos os grupos musculares por igual. Cada xornada traballo unha parte, ata completar o corpo enteiro de luns a venres», explica. Nas competicións, o xurado busca unha simetría física, polo que se adestra máis unha parte que outra, haberá unha descompensación. Ademais de para competir, o ximnasio válelle para desconectar «do traballo e de calquera problema» que teña.
A pesar de que aínda está a empezar a competir, xa ten claro que quere seguir crecendo no mundo do fitness, pero sen desatender a unha clientela que non pensa renunciar aos seus croissants.
