O BNG leva ao Parlamento os problemas na asistencia sanitaria no municipio
18 ene 2019 . Actualizado ás 14:41 h.Máis dun centenar de veciños sumáronse este mediodía á concentración promovida polos grupos municipais do BNG e EU ante o centro de saúde de Fene para protestar polos «recortes» nas prestacións sanitarias do municipio. Os convocantes denuncian que, debido á amortización dunha das prazas de facultativo, a localidade terá «un 20 % menos de médicos» coas consecuencias que isto implica para os pacientes.
«Feijoo deixa a Fene sen un médico» e «Non aos recortes do PP na sanidade» eran algunhas das mensaxes que lanzaban os participantes na mobilización. Explican as formacións que integraban o anterior equipo de goberno local que, de forma inmediata, pasarán de seis a cinco os médicos de familia que presten os seus servizos no centro de saúde en horario matinal, tendo que asumir as cartillas do facultativo que se xubila.
Coincidindo coa protesta, o BNG acaba de presentar unha batería de preguntas no Parlamento de Galicia acerca das carencias do Punto de Atención Continuada de Fene «derivadas da non substitución de persoal, reducción de persoal no verán e, agora mesmo, da amortización do médico por xubilación» e se se ir adoptar medidas para reverter a situación.