As Pontes, Cedeira, Fene e Ortigueira lideran o programa da Deputación
30 oct 2025 . Actualizado á 05:00 h.Lita contesta o teléfono desde o seu zapatería dAs Pontes, Zonko, mentres atende a un número de clientes que se multiplicou nos últimos días. A razón desta «inxección tremenda», nas súas propias palabras, para o pequeno comercio son os bonos de desconto que ofrece o programa MercaNaVila, impulsado pola Deputación nos municipios de menos de 20.000 habitantes. «A semana pasada non traballaría nin a metade», recoñece
Leva 29 anos a cargo da zapatería Zonko, que lidera as vendas do programa MercaNaVila nas comarcas de Ferrolterra, Eume e Ortegal. «Viñamos dunha campaña que non empezaba porque ata hai unha semana estabamos en manga curta», explica esta veciña adoptiva dAs Pontes, o municipio onde máis se fixo uso dos bonos.
O concello sitúase á cabeza con 166.546,06 euros de facturación, o 6,12% do total provincial, e 44 establecementos. Séguenlle Cedeira, con 79.834,77 euros e 23 comercios; Fene, con 63.049,27 euros e 28 comercios, e Ortigueira, con 48.564,99 euros e 14 comercios. Entre os catro municipios superan os 358.000 euros en vendas, un 13??% do total provincial, que ascende a 2.723.068,35 euros. Outras localidades como Mugardos, Pontedeume, Cariño, Ares, Valdoviño, San Sadurniño, Neda, Moeche ou Cabanas tamén participan, contribuíndo a reforzar a economía local e o consumo de proximidade.
Esa proximidade é a que define ao pequeno comercio, cree Lita, que lamenta que o sector está a pasar por unha situación «moi dura», pero confía en que volverá rexurdir. Para ela é importante salvar este tipo de negocios por dúas razóns. A primeira, polos postos de traballo que xera —ten dúas empregadas—. A segundo, esa proximidade cos clientes que non se atopa nos centros comerciais nin nas grandes cadeas. Un bo exemplo desa proximidade é ela mesma, que se dedicou a descargar os bonos a todos os clientes que cruzaban a porta da súa zapatería. Ten outro comercio en Vilalba, polo que tamén puido comparar que os bonos contribuíron a aumentar o volume de vendas, xa que só se aplican na provincia da Coruña: «Estou moi agradecida por esta inxección, foi marabilloso, oxalá se repita».
O presidente da Deputación, Valentín González Formoso, destacou que «o programa MercaNaVila está a demostrar a forza do pequeno comercio como motor de desenvolvemento económico e social nos nosos concellos, xerando actividade, emprego e cohesión territorial. As cifras estannos mostrando que cada vez son máis os comercios que se suman á campaña e os consumidores que usan os descontos de MercaNavila».