As Pontes e Mañón recollen 60 cabalos que causaban danos e riscos para a seguridade viaria

A recollida, o 23 de febreiro, de sete reses equinas de propietarios descoñecidos no lugar de Currodeguas, na parroquia de Grañas do Sor, por iniciativa do Concello de Mañón, súmase aos operativos desenvolvidos pola Policía Local das Pontes nos dous últimos anos. En total, neste tempo foron requisados 57 cabalos, eguas e poldros que andaban soltos polas inmediacións das estradas AC-101, que vai desde As Pontes ata Ortigueira, e DP-4401, que comunica a anterior vía coa localidade mañonesa do Barqueiro.

O último caso viviuse hai pouco máis dunha semana en Grañas do Sor. Os sete animais recolleitos foron confinados nunhas instalacións de Cabreiros, no municipio de Xermade. No bando emitido polo alcalde, Alfredo Dovale, indícase que «as persoas físicas ou xurídicas que sexan propietarias dos animais e que reclamen o rescate deberán acreditar a súa propiedade, perante a autoridade municipal competente, facerse cargo dos danos que tivesen causado e identificar os equinos, previamente á súa retirada das dependencias de custodia». «Tamén deberán aboar os gastos de captura e mantemento durante os días de confinamento», prosegue.

O decreto 142/2012, de 14 de xuño, polo que se establecen as normas de identificación e ordenación zoosanitaria dos animais equinos en Galicia, establece que as reses capturadas «non identificadas e non reclamadas, consideraranse mostrencas para todos os efectos». Isto implica que «a autoridade municipal competente poderá decidir, previa resolución motivada, a venda dos animais en poxa pública, a entrega gratuíta a espazos de acollida con capacidade de recepción, ou o envío a sacrificio en matadoiros autorizados con destino final á destrución deses animais».

O Concello de Mañón abriu un prazo de cinco días hábiles para que os donos dos equinos puidesen reclamalos, informando o bando no taboleiro de anuncios e na páxina web municipal, e nos establecementos públicos de Grañas do Sor, onde foron recollidos os animais. «É un problema para os veciños», recalca Dovale. Corrobora que a situación se remonta a varios anos atrás, con varios intentos frustrados de liquidala. «Agora tamén temos unhas vacas soltas pola parroquia de Mañón -engade-, que á parte de meterse en leiras e na estrada, co perigo que supoñen para o tráfico, xúntanse coas doutros veciños. Como están sen sanear, é un risco porque poden contaxiarlles algunha enfermidade e iso preocupa aos gandeiros».

Queixas dos condutores

Nas Pontes realizáronse tres actuacións deste tipo ao longo dos dous últimos anos. Nunha foron capturados seis exemplares; noutra, 28; e na terceira, 16. «O problema maior é para a seguridade viaria», subliña o xefe da Policía Local, Anselmo Pellón. Asegura que se reciben queixas, case a diario, de condutores que circulan pola estrada AC-101. A maioría canalízanse por vía electrónica, alertando da presenza de reses polas marxes da vía ou mesmo atravesándoa. Os axentes contan coa colaboración dun experto no manexo deste tipo de animais e a axuda dun traballador municipal moi afeccionado ao mundo equino.

«É un perigo moi grande para a circulación», recoñece Pellón. Os incidentes hanse reducido por mor destas intervencións. En ningún dos casos apareceu o propietario. «Unha vez que se efectúa todo o trámite e non se sabe nada do dono, a Xunta manda un veterinario para comprobar os crotales, porque nós, no Concello, non contamos con este servizo, e se non téñenos ponllos. Os que recollemos nas Pontes fóronse a espazos de acollida, uns a Sabucedo e outros a Lourenzá», indica o responsable policial.

Aínda que nas zonas por onde adoitan deambular sábese a quen pertencen, os donos eluden reclamalos, entre outros motivos, polo custo que lles suporía, ao ter que facerse cargo de todos os gastos, «uns cen euros por cabeza», segundo estima Pellón. As operacións paralizáronse por mor da pandemia, posto que se suspenderon os prazos administrativos. «O covid colleunos con 16 cabalos aquí, e se hai que pagarlles o mantemento non é viable, polo alto custo que xeraría ao Concello, polo que tivemos que facer un informe para que se axilizase o trámite neste caso», agrega.

A principal preocupación radica na seguridade viaria, pero os veciños das áreas afectadas tamén se queixan polas desfeitas provocadas por estes animais en pastos e cultivos.

---

---

---