Alcaldes de municipios coruñeses e lucenses, deputados e líderes sindicais sumáronse á multitudinaria manifestación
21 sep 2019 . Actualizado ás 15:21 h.«Non recordo nas Pontes unha manifestación así xamais», subliña o alcalde do municipio Valentín González Formoso. A vila viviu onte unha xornada histórica na que máis de cinco mil persoas saíron á rúa para reivindicar unha transición enerxética xusta e evitar a parálise da planta térmica.
O apoio galego aos ponteses é unánime. Apoiaron a multitudinaria protesta unha ampla representación de concellos de Galicia, como os alcaldes de Xermade; Ortigueira; Cedeira; Cariño; Cerdido; Mañón; Valdoviño; Moeche; San Sadurniño; As Somozas; Narón; Ferrol; Narón; Fene; Pontedeume; Mugardos; Neda; Betanzos; Miño; Oroso; Ponteceso; Malpica e Vimianzo; os tenente de alcalde da Capela e Ares, e concelleiros de Vilalba. «Houbo unha concentración de alcaldes que non se viu en ningún outro conflito galego», agradece o primeiro edil pontés. Pero tamén representantes da política autonómica e nacional e líderes sindicais así como deputados nacionais; o portavoz do PSOE no Parlamento galego, Xaquín Fernández Leiceaga; o vicepresidente do Parlamento, o popular Diego Calvo; deputados provinciais do PSOE e PP; e dirixentes de CC.OO., UGT CIG, entre moitos outros.
Todos se sumaron a esta histórica protesta a unha vila que se botou unida á rúa para reivindicar unha transición xusta. «A xente veo como un tema do país. É un dos motores económicos de Galicia», recoñeceu González Formoso.
A loita non rematará aquí, alerta o rexedor. «Continuaremos coas accións de protesta agardando a cita no ministerio para a que non hai data, agardamos que sexa a principios de outubro», indicou. Xa se manifestaron diante da Xunta de Galicia e da Delegación do Goberno. «Agardaremos a esa reunión pero, se nela non se aclara o futuro ou non se ve compromiso por parte de Endesa, continuaremos coas mobilizacións», avanzou o alcalde pontés.
Un dos colectivos máis afectados, os camioneiros, mantén un peche simultáneo nas casas consistoriais das Pontes, Ferrol e Vilalba. «Levamos encerrados tres semanas, antes xa fomos a Madrid cos camións. Empezamos a pelexar fai catro meses e medio porque sabiamos o que se nos viña amais », explica Manuel Bouza, presidente da Asociación do Colectivo de Transporte do Carbón. É un dos 140 camioneiros que participan no peche simultáneo en quendas de doce horas. «Desgasta moito, e iso que temos experiencia», lamenta, aínda que seguirán de forma indefinida. «A finais de mes iremos a Madrid para ver o que nos contan e senón volveremos á capital con todos os camións», avanza. Apunta que máis de 150 camións están afectados pola paralización.
A situación política convulsa a nivel nacional coa reedición das eleccións non é o mellor dos escenarios, pero As Pontes necesita implicación xa. «Hai moito traballo que facer e moito compromiso que expresar. Endesa ten que ser forzada polos gobernos da Xunta de Galicia e do Estado. Tanto Santiago como Madrid teñen que facer os seus deberes», reclamou. Aínda que González Formoso está convencido de que haberá avances para evitar a paralización da central. «Estou seguro de que o van facer. Cónstanos o compromiso do presidente da Xunta e o da ministra de Transición Ecolóxica para intentar que Endesa expoña alternativas para que funcione esta central. Pero queremos velo», insistiu. Tamén brindou todo o seu apoio para a contenda. «Van ter todo o noso apoio para que iso sexa posible, senón, o peche está máis inminente que nunca», lembra o rexedor.
Impacto económico
O impacto económico que pode ter o peche da planta en Galicia é millonario. «Imos encargar á Universidade da Coruña un estudo que analice o impacto nas comarcas ás que afecta a central térmica. Coñecemos o impacto local e creo que Endesa ten os datos do impacto global», avanzou o alcalde. Aínda que, só no sector do transporte, sería xa algo millonario. «Estamos a falar de 30 millóns de euros ao ano dos que 10 quedan nas Pontes, 20 nas comarcas de Ferrolterra e Terra Chá. Os persoais da principal, auxiliares e os propios transportistas son de lugares moi diversos. Nas Pontes vive unha porcentaxe moi pequena, a maioría son de Ferrolterra e Terra Chá. Outro exemplo, moita xente prexubilada de Endesa vive en municipios como Cabanas ou Pontedeume. O impacto é enorme», expuxo González Formoso. O Concello das Pontes recibe máis de 3,5 millóns de euros da central, case o 30 % do orzamento, en impostos; nas compañas auxiliares traballan máis de 250 persoas, ademais dos 150 transportistas do carbón.
«A cidadanía é consciente dá catástrofe económica, social e patrimonial se pecha a central. Non entendemos que fallou agora despois de que se aprobase a transformación», destacou José Castro, o presidente da Asociación de Empresarios Seara na súa intervención esta mañá no programa Voces de Ferrol de Radio Voz.
Tamén trasladou ao alcalde a súa preocupación pola crise e a incerteza sobre o seu futuro o bispo da Diocese de Mondoñedo Ferrol, Luis Anxo das Heras. «Confiamos que poidan atoparse as solucións necesarias polo ben do noso pobo e de tantas familias das Pontes e doutros concellos veciños que ven perigar o seu medio de vida. Encomendamos a Deus esta situación, tendo en conta a todos os implicados, para que se resolva con esforzo, verdade, xustiza e solidariedade».