A droga foi descuberta por membros do GES de Mugardos
17 ago 2019 . Actualizado ás 18:11 h.Un incendio rexistrado a tarde-noite do xoves nunha caseta situada na localidade de Cervás, no municipio de Ares, puxo ao descuberto unha plantación e secadero de marihuana. A Garda Civil detivo con posterioridade ao propietario, un veciño de Fene, de 37 anos, cuxa identidade responde ás iniciais B. M. F., que onte foi posto a disposición xudicial e quedou en liberdade con cargos por un suposto delito contra a saúde pública.
A droga foi descuberta por membros do GES de Mugardos, que foran mobilizados pola central de urxencias do 112 polo aviso dun incendio en Ares. Cando chegaron ao lugar dos feitos viron que saía fume polas uralitas do tellado e a súa intención era derrubar a porta da caseta por se había alguén no interior. Tiveron que saltar por amais de dous portais que estaban pechados, e cando se achegaron a porta xa viron no exterior macetas con plantas de marihuana, polo que se dirixiron á Policía Local de Ares, que xa estaba alí, para preguntar se abrían ou agardaban á Garda Civil.
Os axentes municipais indicáronlles que franqueasen a entrada para sufocar o lume, xa que na zona hai maleza, un transformador eléctrico e unha vivenda moi próxima. Unha vez controlado o incendio, observaron que unha estancia da caseta estaba a ser utilizada como secadero e na outra había máis plantas en crecemento.
O 112 tamén mobilizou aos bombeiros de Ferrol, con cuxa cámara térmica o GES comprobou que xa non quedaban rescaldos.
Ao operativo sumáronse efectivos da Garda Civil dos postos das Pontes e Mugardos, que, con posterioridade, detiveron ao dono das instalacións e incautáronse das 31 plantas que estaban en macetas e outras 25 sometidas xa ao proceso de secado. A caseta estaba equipada con ventiladores, un transformador eléctrico e extractores, entre outro material.
O home foi posto a disposición do Xulgado de Instrución número 1 de Ferrol onte pola mañá e negouse a declarar, do mesmo xeito que xa fixera de madrugada no cuartel a Garda Civil. Quedou en liberdade con cargos.