Condena unánime ao narcotráfico nun bronco pleno de Narón tras a polémica da foto de Oubiña
FERROL
Nunha intensa sesión, o goberno local tamén pediu «desculpas se alguén se sentiu ofendido» pola imaxe na que o cambadés aparecía xunto a dous concelleiros
31 oct 2025 . Actualizado á 12:52 h.Nun bronco pleno celebrado onte a última hora da tarde, a corporación de Narón aprobou por unanimidade unha declaración de condena ao narcotráfico. A resolución serviu para rexeitar «calquera forma de narcotráfico, crime organizado e branqueamento das súas figuras, manifestando o apoio institucional ás vítimas e ás entidades que loitan contra a drogadicción en Narón». E chega tras a polémica da fotografía de dous concelleiros do goberno local de Terra Galega, na que posaban xunto a Laureano Oubiña cando este participou na recente Feira do Mel. A imaxe compartiuse nas redes sociais do perfil oficial do Concello de Narón, aínda que despois se borrou.
O pleno foi solicitado polo PSOE (co apoio do PP), que esixiu primeiro que os concelleiros que posaron con Oubiña (Manuel Ramos e Mar Gómez, de Sanidade e Mercados) pedisen desculpas publicamente «e ante ou seu silencio queremos a súa dimisión».
Durante a sesión, o portavoz do grupo de goberno de Terra Galega, Román Romero, manifestou «as desculpas do grupo, se alguén se sentiu ofendido»; en relación á imaxe compartida. E asegurou que «un erro non é un delito, nin unha foto unha falta de ética; a política debe basearse en feitos, non en titulares nin linchamentos mediáticos».
O texto aprobado por todos os grupos (TeGa, PP, BNG e PSOE) tamén condenou «calquera comportamento, xesto ou manifestación pública que poida supor unha banalización nas consecuencias do narcotráfico».
Outra polémica coa frase da alcaldesa ao final da sesión
Segundo Jorge Ulla, desde o PSOE local, «é inaceptable que Narón, sendo coñecida lamentablemente por albergar un dos maiores supermercados da droga do noroeste de España, teña concelleiros do goberno fotografándose cun capo do narcotráfico». Ulla tamén criticou «o comportamento autoritario e bochornoso da alcaldesa, Marián Ferreiro, con improperios que evidencian o seu nervosismo e falta de argumentos». En concreto, a rexedora ao finalizar a sesión e xusto tras a última intervención de Ulla lanzou un «a tomar por cu» que se pode escoitar na gravación do pleno. Segundo os socialistas, «amósase o seu escaso respecto pola democracia e polo respecto institucional que se debe gardar nun pleno».
A rifa foi a máis no pleno segundo un comunicado enviado polo PP. Os populares aseguran que «familiares e achegados dos concelleiros de TeGa asistiron cunha actitude agresiva, chegando a insultar aos portavoces do Partido Popular e PSOE». Segundo o portavoz popular, Germán Castrillón, «sorprendeunos a pasividade da alcaldesa, que en ningún momento interveu para reclamar orde ou respecto, algo que contrasta coa súa habitual actitude cando as críticas afectan o seu equipo». E concluíu que «hai moitos veciños que lembran os anos máis escuros da droga, e outros que o tiveron que vivir moi de preto; vivir esa historia e hoxe minimizar así a súa dor é vergoñento e intolerable».