Postos da Peixaría de Ucha confían en que funcione, pero demandan maior concreción
19 sep 2025 . Actualizado á 11:43 h.«Entras pola porta e as mesas do medio están baleiras, parece abandonado, pobre e sucio». Esa benvida que describe unha placera é a imaxe que levan quen actualmente se penetran na nave da Peixaría de Ucha. E que en 2027 debería ser ben distinta. O proxecto do gastromercado está chamado a ser a metamorfose do emblemático recinto, unha iniciativa municipal que se acolle na praza entre a esperanza e a cautela. Boa parte dos postos saúdan a chegada dun proxecto que, confían, renovará e modernizará a imaxe do conxunto. Noutros, pesan aínda as dúbidas polo que falta por concretar e as obras que se aveciñan. E todos convivirán en novo mercado que actualizará a súa estética, gañará accesibilidade e espazo diáfano, coa supresión das mesas centrais. E que, sobre todo, ofrecerá un servizo ata o de agora inexistente, co que contan moitas outras cidades e localidades españolas e galegas: a posibilidade de degustar no propio mercado os produtos adquiridos nos mostradores.
«Todo o novo atrae», «mellorar imos mellorar, iso está claro», conveñen en varios postos. No entanto, demandan información sobre un proxecto que, contan, aínda non viron. E que para ningúns dos postos suporá unha mudanza que descoñecen a que lugar da nave levará. «Non sabemos absolutamente nada», expoñen. Tampouco de como funcionará nin se as tarefas que precisará o gastromercado obrigaralles a pechar nalgún momentos. Porque a información que manexan difire segundo o mostrador, e vai desde a plena compatibilidade da actividade, cos traballos en horario de tarde e os luns, á de que terán que pechar varios días ou ata dúas semanas. Xunta e Concello achegarán os 357.000 euros necesarios para esta transformación.
Javier Pérez Bustabad, Peixes Tinita Cedeira
«Ferrol está a mellorar e todo o que fagan está ben»
«Creo que se o fan vai ir ben. Todo chama. E á parte, vai ver máis limpeza, e son todo melloras», resume a súa visión Javier Pérez Bustabad, placeiro que atende desde «toda a vida» o posto de que a súa nai levou durante medio século, Peixes Tinita Cedeira. Aínda que «Ferrol non é unha cidade como hai anos, está a mellorar. E todo o que fagan está ben», abunda sobre unha intervención que «creo que vai funcionar, hase de saber». É consciente das molestias que virán coas obras de remodelación, pero «hai que ter paciencia», avoga, porque «cando se acaban de facer son unha marabilla». «A ver se dá bo resultado», desexa.
David García e Esmeralda Prieto, Esme e David
«No verán vai funcionar seguro, é un aliciente máis»
«Á praza facíalle moitísima falta unha reforma, quedamos poucos e está moi sobredimensionada; dá a impresión de que está baleira cando non o está», expón David García. Explota onda Esmeralda Prieto o posto que leva os seus nomes, Esme e David, e o gastromercado «paréceme unha boa idea. Todo o novo chama e é un aliciente máis», di sobre o posto de degustación e destacando o corredor turístico no medio, os bancos e a insonorización prevista: «Chégase aos 100 decibeis», sostén. «Se non facemos algo, morremos. Algo hai que facer, e se funciona ou non haberá que velo», engade convencido de que «no verán vai funcionar seguro».
Cristian Ribeiro, mesa central
«Isto non é Santiago a Coruña, pero probar non está mal»
Ocupa unha das dúas únicas mesas centrais que conservan a actividade, sen saber onde será reacollido. É o que máis lle pesa a Cristian Ribeiro, que demanda información: «Non é o mesmo estar onde estou, que xa teño á xente, que que te manden para outra esquina», argumenta. «Deberían dicilo», insta, porque ata o momento, di, só transmitiron «pouca cousa: que ían facer un cocedero, pór unhas mesas e pouco máis. E que aos das mesas ían pór en postos baleiros. Pero onde?», insiste. Sobre se funcionará o gastromercado, responde: «Ao cento por cento non o sei, Ferrol non é como Santiago a Coruña, pero probar non está mal», admite.
Rocío Soto, Peixes Niki
«Van modernizar un pouco e iso sempre é bo»
A cargo de Peixes Niki, Rocío Soto considera que co gastromercado «van modernizar un pouco, e iso sempre é bo». «Sempre é unha novidade e á xente pódelle chamar a atención. O resto, verase co tempo: hai sitios onde funciona moi ben, outros nos que empezou moi ben e logo foi mal... Tamén depende de quen leve e como o traballe», advirte. «As obras van crear problemas, pero é unha cousa temporal que se supón que é para mellorar, e véxoo ben», asume. No entanto, para dinamizar o mercado Asperxo teno claro: outorgar postos con «concesións como deus manda, non por dous anos, porque iso bota cara atrás», defende.