O gremio teme os efectos do terceiro peche e os clientes apuraron hoxe o último café ao aire libre. Este mércores só abrirán un 10 % dos locais
26 ene 2021 . Actualizado ás 19:52 h.A que sabe o último café nunha terraza? A tristeza. A despedida. A resignación. Pero tamén, e sobre todo, «a gloria». Nin a choiva foi capaz este martes de arrincar aos ferroláns o agridoce sorbo ao aire libre que non poderán repetir en, polo menos, tres semanas. «Con moita pena» tomábanllo María Eugenia e Francisca Romero , dúas irmás de mediana idade, en La Antigua, xunto á praza do Callao. «Pero non por nós, que podemos pasar sen café, senón porque hai moita xente que se vai quedar sen traballo», aseguraban. O novo peche da hostalería suporá o terceiro e, para algúns negocios, último mazazo da pandemia. «Peor non podemos estar, a situación é dramática», asegura o presidente da Asociación de Empresarios de Hostalería de Ferrol e Comarca, EmilioVázquez , que estima que «o 30 % dos locais non volverá abrir as portas». Algúns, aínda están pagando os custos do primeiro. E para outros é o terceiro peche, «e iso non hai economía que o soporte». No lecer nocturno, sostén, «a metade queda xa fóra», tras un ano pechados pero soportando gastos. Culpa da situación ao intento por «salvar» o Nadal. E avoga por «cortar isto dunha santa vez», aínda que supoña o peche total da hostalería. Con axudas, claro. Pero «ninguén quere pagar a factura, e isto vaise a traducir en alongar o sufrimento dos hostaleiros que se van quedar polo camiño, froito da falta dunha decisión seria. A situación non pode ser máis insostible. A hostalería sempre está na diana, e en canto hai un pequeno movemento, veñen por nós», lamenta.
Chus Pombo, do Corchea, na praza de España, descoñecía onte ao mediodía, pendente do DOG, se hoxe podería abrir para servir cafés, aínda que sexa en vaso de cartón. A asociación de hostaleiros estima que só o farán un de cada dez negocios da comarca, aqueles que dispoñan de servizo para recoller ou envío a domicilio. «A xente quere contribuír e di que se abro van vir a buscar o café. Para levar teño unha media duns 50 diarios. A min, persoalmente, si me compensa, porque estou eu soa», explica. «Pero porque boto unha chea de horas, teño unha empregada a media xornada en ERTE e porque é unha zona de bastante tráfico de xente», valora. «Non me dá para gañar moito diñeiro, pero para cubrir gastos si», recoñece. Na súa terraza, como en todas, o omnipresente coronavirus enche as conversacións. «Hai que aguantar o temporal», di un home. A muller que o acompaña recoñece que «máis que o virus preocúpame a situación do país». E lamenta o peche: «A hostalería dá moita vida á cidade, dáme sensación de tristeza». No Avenida, tras un longo intre agardando para ocupar dúas mesas e cumprir así co establecido, departen acaloradamente cinco amigas: «É o noso último día». A partir de hoxe, nin café nin encontro. Mostran a súa indignación polos negacionistas, e reclaman sancións máis duras a quen incumpren as normas. E arremeten contra «os políticos e os curas» que se vacinaron antes do que lles correspondía. O debate é agre. Pero este último café, aseguran, sábelles «riquísimo»: «A gloria».
Críticas por cobros da taxa de terrazas do 2021
Algúns negocios da cidade recibiron estes días cartas de pagamento do Concello de Ferrol requirindo o abono da taxa correspondente ás terrazas deste ano, desde o 10 de maio, data na que expira o estado de alarma vixente, ao 31 de decembro. Estes recibos xeraron malestar entre os afectados: «É incrible que coa que está a caer, e sen saber que vai pasar despois, váiannos cobrar por adiantado as terrazas deste ano», reprochou un deles.
Desde o Concello aclarouse que estes recibos só se expediron por solicitude de novas terrazas ou ampliacións, e que foron casos moi puntuais. No entanto, fontes oficiais confirmaron que xa non se pasará ningún cobro máis deste tipo polas terrazas ata que se levante o estado de alarma, e que se a situación se prolonga, devolverase o abonado.
