Sara Couce: «Case sempre me elixen para dobrar á mala, ao neno cafre ou aos frikis»

Unha se enchufa a ver unha serie en Netflix ou HBO e o que menos se pode imaxinar é que a leste ou a aquel personaxe ponlle voz unha moza de aquí ao lado. De Perlío, sen ir máis lonxe. Pero é así. Resulta que Sara Couce (Fene, 1989), á que moitos coñecen como cantante e baixista do grupo ferrolterrano Superglú, é tamén actriz de dobraxe. E desde fai xa sete anos, presta a súa voz a documentais , pero tamén a personaxes de películas e series de televisión. A lista é bastante longa, pero, para non estendernos demasiado, poremos só algúns exemplos. Sara é a voz de Kipo , a optimista e atípica heroína da serie de animación do mesmo nome que se emite en Netflix. Tamén dobrou á ovella Lanitas de Doutora Xoguetes ou a Zeta en Shimmer e Shine. E grazas a ela podemos escoitar falar en español a unha das protagonistas da serie Pares e Nones de HBO. Ou tamén a Tomika , a baixista e cantante adolescente de sériea Escola de Rock.

«Quizais sexa pola miña voz grave, pero os personaxes que me ofrecen nunca son angelitos nin a típica princesita. Case sempre me elixen para dobrar á mala, ao neno cafre ou aos frikis», comenta entre risos Sara. Esta «perliense» -como di ela, «porque eu son moi da miña parroquia»- descubriu a súa paixón pola dobraxe tras estudar Comunicación Audiovisual en Santiago. Un amigo faloulle dun estudo de Ferrol que impartía cursos, animouse a probar... E foi así como Sara aprendeu as primeiras leccións do oficio nas salas de Penteo Films, na parroquia ferrolá de Serantes, da man de José Polo. «Eu ao principio pensaba que non ía servir para isto, porque vía que non tiña a típica voz da moza prota dunha comedia romántica, pero el sempre me animou e dicíame que non me tiña que comparar con ninguén. Foi moi bo mestre», di con agradecemento cara ao seu primeiro profesor.

«Cu inquedo»

Aquel curso celebrouse no 2012, e desde entón, Sara non deixou de traballar para estudos da zona de Santiago e A Coruña. Asegura que lle encanta a súa profesión, porque «cada rol supón un reto», «sempre estás a aprender», e iso encaixa moi ben co seu carácter de «cu inquedo», nunca disposto a acomodarse. Entre os seus personaxes preferidos, cita a Kipo, porque é moi «flower power», «sempre pensa que todo se pode resolver con amor» e tamén polo seu forte carácter. «Vexo que os personaxes femininos das series están a cambiar, cada vez hai máis mozas guerreiras no canto de nenas doces e ñoñas, e iso gústame», afirma compracida.

Sara asegura que para ser unha boa actriz de dobraxe hai que «mimetizarse co personaxe» e «pasar desapercibida». «Se estás vendo unha película e fíxasche na dobraxe é que algo falla», advirte. Pero cando lle toca pisar o escenario, como cantante e baixista, Sara transfórmase. E aí si que nunca pasa desapercibida. «É que Sarita é pura enerxía, un auténtico animal de escenario, e no día a día, unha persoa que transmite amor polos catro costados», di dela Coke Blanco , compañeiro de andanzas musicais en Novo Plan.

Sara milita neste grupo ferrolán desde hai tempo -tamén estivo en formacións como Choiva nova ou Death Avenue-, pero a súa banda de cabeceira é Superglú, onde máis que compañeiros atopou unha segunda familia. Tras sacar á luz Que ben! e Revolución, o grupo prepárase agora para lanzar o seu terceiro disco. «Son dez temas moi superglú, porque son moi variados, e ímolos a ir presentando aos poucos, cada single co seu vídeo», anuncia ilusionada Sara, que ademais do baixo tamén toca o piano e o ukelele e dá clases de canto na Escola de Teatro O Ruiseñor de Culleredo, onde vive coa súa parella.

Cóntame que fai tres anos tivérona que operar dun pólipo nunha corda vocal, e por iso agora cóidase moito a voz. «Como lles digo aos meus alumnos, o máis importante é o descanso e quentar sempre a voz antes de cada actuación», revela. Para rematar, pregúntolle por ese personaxe soñado ao que lle gustaría dobrar. E despois de pensalo un intre, responde sen dubidar: «Sería estupendo poder dobrar a Scout, a nena da película Matar a un ruiseñor. Encántame ese personaxe».

---

---

---