A mesa de negociación celebrará a primeira reunión o 27 de xaneiro
20 ene 2021 . Actualizado ás 15:22 h.Os traballadores de Siemens Gamesa da planta das Somozas non se expoñen outro escenario que non sexa o de botar por terra o expediente de regulación de emprego (ERE) que ten sobre a mesa a compaña. Para evitar os 215 despedimentos que implica o peche da fábrica de pas, os representantes do comité de empresa queren solicitar «por escrito» un apoio político que xa recibiron de palabra na súa visita ao Parlamento de Galicia este martes. Populares e socialistas así llo expresaron, segundo indicou o presidente do comité, Sergio López. «Ese apoio querémolo levar á mesa negociadora e tombar o ERE», sinalou o portavoz dos traballadores. «Imos loitar por manter a planta aberta», aseverou. O martes formalizouse en Madrid a mesa de negociación que regulará o proceso. Estableceuse o calendario de reunións; a primeira delas, o 27 de xaneiro. Hai outras tres planificadas en febreiro.
A planta está xa pechada baixo sete chaves. E os traballadores, en folga . «A compaña alega causas organizativas e produtivas, non económicas, pero é unha deslocalización pura e dura para reducir en salarios e custos das pas. Non o din, pero son motivos económicos», recalcou López. «Hai pedidos do modelo 114, pero quéreno fabricar noutros mercados», asegurou. «A nosa proposta é que siga a planta aberta e que se faga investimento. Por parte das Administracións non hai dúbida de que están a favor, pero a empresa non quere» porque, apuntou, «sae máis barato fabricar en Portugal , na India e en Tánxer».
