O achado tivo lugar na estrada de Castela, na zona do Inferniño, e o diñeiro xa foi devolto ao seu mozo propietario
19 feb 2020 . Actualizado ás 17:04 h.Aínda queda xente honrada no mundo. E se non, que llo pregunten a un mozo de Ferrol que o martes pasado levou un gran desgusto ao comprobar que perdera o sobre de plástico no que levaba a cartilla do banco e ao redor de catrocentos euros en efectivo. Por sorte, unha señora maior atopouno nunha beirarrúa da estrada de Castela, na zona do Inferniño, e leste mesmo mércores, nada máis levantarse, entregou a cartilla e o diñeiro na Oficina de Obxectos Perdidos situada no Concello de Ferrol.
A partir de aí, localizar ao propietario foi moi sinxelo. A Oficina deu conta do achado á entidade financeira da cartilla, Abanca, que enseguida chamou ao seu cliente para darlle a boa noticia. Resultou ser un mozo do barrio do Inferniño, que pouco tempo despois se presentou coa súa nai no Concello para recuperar as súas pertenzas. Desde alí mesmo chamou á señora que as atopou e deulle as grazas por ser unha persoa «tan honrada».
A principios do pasado mes de setembro, o centro comercial Parque Ferrol foi escenario dun episodio similar. Un veciño atopou alí un sobre con algo máis de 600 euros e fixo entrega do mesmo á Policía Local. Pouco despois, a súa propietaria recuperaba o diñeiro, que perdera tras comprarlle roupa á súa neta na tenda Orchestra. No sobre levaba o diñeiro da pensión, que pouco antes sacara do caixeiro.