O estudioso da Universidade de Coimbra Francisco López Núñez impartiu a charla
21 sep 2019 . Actualizado ás 05:00 h.En función de cada lugar chámanse bugallos, carrabouxos, cocas, bullacas, carragouchos ou mazacucas e para moitas persoas supoñen recordos de nenez, xa se usaron para algúns xogos considerados xa tradicionais. Con todo, poucos coñecen a orixe destas estruturas que ven moi a miúdo nos carballos galegos ou noutras plantas como rosales salvaxes. Por esta razón, a Sociedade Galega de Historia Natural (SGHN) dedicoulles unha xornada na que o biólogo Francisco López Núñez, da Universidade de Coimbra, desvelou que estas formacións que moitas persoas confunden con froitos son, en realidade, a causa da aparición dalgún tipo de parásito no exemplar.
Poden ser virus ou bacterias, que xeran agallas ou outro tipo de crecementos deformes das plantas (como os denominados tumores). O experto portugués relatará que se trata dun fenómeno que deixou pegada na contorna natural e no social, xa que moitas culturas os incorporaron nas súas tradicións.
A Sociedade Galega de Historia Natural continúa coas súas actividades, posto que hoxe se celebra a primeira das saídas a Doniños baixo un programa que se chama A biblioteca sae ao medio e no que colabora o Concello. Unha das expedicións é diúrna e a outra nocturna, pero ambas son ao mesmo enclave, as inmediacións da lagoa e o sistema dunar de Doniños, para facer unha comparativa entre a flora e a fauna, así como o espazo.
As prazas están esgotadas para unha actividade que se alongará durante tres horas.