Os ferroláns buscan crédito cun triunfo ante o Compostela
14 oct 2018 . Actualizado ás 05:00 h.O Racing enfróntase hoxe (18 horas na Malata) ao Compostela nun dos partidos máis prometedores da Terceira División. Este encontro, así como os que disputará a continuación fronte ao Arousa, Bergantiños e UD Ourense, ofrece aos ferroláns a posibilidade de gañar crédito e reengancharse nos postos de cabeza. Os racinguistas hanse mostrado máis fortes en casa que lonxe da Malata, aínda que esta tarde chega un equipo feito, con calidade e que é consciente do que se xoga neste partido. Sobre todo, tras ter caído derrotado nos dous últimos encontros, o que lle afastou da primeira posición da clasificación.
O Racing, desde o adestrador á maior parte dos xogadores, ten detrás un historial que os avala, polo que chegou a hora de deixarse de bobadas, de falar de falta de axuste, inquedanza, cansazo ou un persoal curto. Os que están son os que hai e chega o momento de dar o do de peito. Esta tarde o Racing necesitará saltar ao campo con ganas e sendo conscientes da oportunidade que se presenta diante.
Para este partido, Larraz segue sen poder contar con Marcos Álvarez, que comezara a tempada a un gran nivel. Tampouco se recuperou o capitán Pablo Rey , un futbolista importante neste equipo, especialmente, pola súa capacidade de facer goles en accións a balón parado. O técnico poderá contar con Juan Antonio, que entra na convocatoria, aínda que non estará ao cento por cento, xa que case toda a semana adestrou á marxe do grupo. Cita a dous xuvenís, Sergio Otero e Luis Rodríguez Chacón para botar unha man. O once pode ser o formado por Diego Rivas; Seoane, Catú, Garrido, Villarejo; Joel, Pau Bosch, Armental, Carlos García; Javier Sanmartín e Joselu.
O Compostela chega a Ferrol coa baixa de Álex Ares, un futbolista importante en ataque, pero que non poderá xogar por estar lesionado. Tamén son baixa Rubén e Alberto. Por decisión técnico quedou fóra da convocatoria Álex Ube.
Yago Iglesias tampouco agarda un encontro alcanzable e esta semana destacou a calidade dos racinguistas, especialmente en ataque.
