O colector amarelo é un dos recipientes que máis dúbidas xera entre os usuarios. Estes son os residuos que nunca debes guindar nel
04 feb 2019 . Actualizado ás 05:00 h.Fai case vinte anos que os galegos aprenderon a conxugar o verbo reciclar no seu día a día. A regra das tres erres (reducir, reciclar e reutilizar) empeza cos hábitos dentro do propio fogar, onde varios cubos permiten separar os residuos que producimos. A diferenciación, con todo, vai máis aló do lixo orgánico e inorgánica. Na rúa hai varios colectores distinguidos pola súa cor en función da composición dos desperdicios, ademais de puntos limpos nos concellos para depositar aceite usado, pilas, mobles ou electrodomésticos.
Para moitas persoas, o colector amarelo segue xerando confusión a pesar de levar anos sendo parte do mobiliario urbano. O amarelo é o modelo maioritario de Sogama , ao que están adscritos a maioría de concellos galegos. A diferenza do xenérico, no que se deben depositar só os residuos que non se poden reciclar como cueiros ou panos de mesa usados, o amarelo ten unha función específica: acoller, exclusivamente, botellas e envases de plástico, recipientes metálicos, brics e o resto de envasados que leven un punto verde que distinga que se tratan de refugallos reciclables.
Isto supón que no amarelo vaian residuos feitos con plástico, pero non entran todos dentro desta categoría. En ningún caso debe haber xoguetes de plástico, roupa, utensilios de cociña ou cubos de plástico. Espátulas, escurridores ou biberóns nunca deben ir a este colector. Cando aparecen neles, coñéceselles como residuos impropios: aqueles que non teñen a función de envases.
O amarelo acolle botellas, envases de plástico e brics Os xoguetes, por exemplo, deberán ir ao colector de restos, aínda que hai oenegués que recollen xoguetes usados para obras sociais. No caso de cubos de plástico, como os que os nenos usan para xogar na praia, poden ter unha segunda vida en casa como recipientes, pero no caso de que rompan, haberá que acudir ao colector de restos (xeralmente de cor verde). Os biberóns e chupetes tamén se tiran aí.
Que pasa cos obxectos pequenos de plástico como os bolígrafos? Ao non tratarse de recipientes que sirvan como envase, nunca deberán ir ao colector amarelo. Tampouco as cápsulas de aluminio de café, os vasos e pratos desechables ou os chisqueiros.
Non son impropios os tapóns plásticos e metálicos, por exemplo. Cando se guindan as botellas de vidro ao colector verde, hai que retirar primeiro os tapóns para despois tirar no recipiente amarelo.
Entre os envases tamén hai excepcións, como os que conteñen medicamentos, que han de ir sempre aos puntos SIGRE situados nas farmacias. As caixas de cartón e envases de medicamentos de todo tipo, teñan aínda restos ou estean baleiros, nunca irán ao colector azul do papel, o amarelo dos envases ou o verde de vidro.