A comunidade é a segunda que menos lixo xera: 393,3 quilos por veciño

Ao longo do ano 2013 recolléronse en Galicia algo máis dun millón de toneladas de residuos, 393,3 quilos por habitante, segundo os datos que onte fixo públicos o Instituto Nacional de Estatística (INE). Se se comparan esas cifras co ocorrido nas demais comunidades, o resultado é que Galicia figura en sétima posición entre as comunidades que máis toneladas de lixo recollen, superada por Andalucía, Cataluña, Madrid, Comunidade Valenciana, Canarias e País Vasco.

Con todo, se esa comparación entre autonomías faise en quilos por habitante, Galicia resulta ser a segunda que menos lixo xera. Só Madrid, con 365,9 quilogramos por veciño, sitúase por baixo dos 393,3 quilos que cada galego envía aos colectores. A media de Galicia é tamén notablemente máis baixa que a española, que se situou en 467,6 quilos por habitante.

Deses 1,08 millóns de toneladas que os sistemas de xestión de residuos recolleron en Galicia, 915.700 toneladas foron de residuos mesturados, un parámetro no que a comunidade ocupou o sexto lugar. De vidro recolléronse 38.100 toneladas, e tamén neste caso Galicia ocupa o sexto posto entre as autonomías. O peor lugar no ránking de comunidades ocúpao a galega na recollida de papel e cartón. É a novena con 31.600 toneladas. No que respecta a envases, ocupa o quinto posto, con 21.900 toneladas.

En xeral, os datos do INE desvelan que ao longo do 2013 recolleuse en España un 2,4 % menos de residuos que o ano anterior. As empresas que se encargan da xestión do lixo recolleron 21,8 millóns de toneladas de residuos, dos que 17,9 millóns corresponderon a residuos mesturados e 3,9 millóns a recollida selectiva.

---

---